‘फास्ट ट्राय्कय् जनताया समस्या सम्बोधन जुइ’
येँ – खोना–निजगढ फास्ट ट्रयाय्क दयेकेगु खँय् खोना व बुंगय् खनेदुगु मुआब्जा विवादयात कयाः स्थानीय जनताया अधिकतम माग सम्बोधन यानाः जक आयोजना न्ह्यःने न्ह्याकेगु खँ उपप्रधानमन्त्री लिसें रक्षमन्त्री ईश्वर पोखरेलं धयादीगु दु । प्रतिनिधिसभा राज्य व्यवस्था तथा सुशासन समितिया म्हिगःया बैठकय् न्ववासें उपप्रधानमन्त्री पोखरेलं उगु खँ धयादीगु खः ।
वय्कलं राष्ट्रिय गौरवया आयोजना दयेकेबलय् स्थानीयवासीया गुनासो वये फइगु खँ कनादिसें ज्याय् पंगः थनेगु व विषययात जटिल दयेकेगु कथं प्रस्तुत मजुइत नं इनाप यानादिल । वय्कलं खोना व बुंगय् ५० प्रतिशत मुआब्जा वितरण जुइधुंकूगु खँ कनादिसें आः स्थानीय वासिन्दा मुआब्जा कायेत तयार जुयाच्वंगु तर गुलिखे पक्ष व जनप्रतिनिधितय्सं पनाच्वंगु जकं मखुला धइगु न्ह्यसः ब्वलंगु खँ नं वय्कलं कनादिल ।
मुआब्जा सम्बन्धी कानूनय् स्पष्ट मापदण्ड व अख्तियारी दुगु लिसें नेपाल सरकारं निर्णय यानाः विधिवत रुपं उगु मार्ग दयेकेत नेपाली सेनायात जिम्मा बियागुलिं न्हून्हूगु विवाद हये मजिउगु खँय् वय्कलं बः बियादिल ।
स्थानीय वासिन्दां सरकारं निर्धारण याःगु मुआब्जा उचित मजू धासें उकियात अप्वयेकेमाःगु, ऐतिहासिक महत्वया थाय् संरक्षण यायेमाःगु माग याना वयाच्वंगु दु । वय्कलं खोना व बुंगय् द्रुतमार्ग, बाहिरी चक्रपथ लगायत थीथी आयोजनां पिने वइपिं मनूतय्गु चाप अप्वयाः जुइफइगु समस्या प्रति प्रधानमन्त्री तहलय् तक सहलह यानाः स्थानीय जनताया माग सम्बोधन यायेगु कुतः यायेगु खँ कनादिल ।
फास्ट ट्रयाय्क दयेकेगु निंतिं नेपाल सरकारं २०७४ वैशाख २१ गते मन्त्रिपरिषद्या निर्णय कथं सेनायात जिम्मा बिउगु खःसा तत्कालीन प्रधानमन्त्री पुष्पकमल दाहालं २०७४ जेठ १४ गते शिलान्यास यानादीगु खः ।
समितिया दुजः लिसें यलया सांसद पम्फा भुसालं आयोजनाया नामय् न्ह्याबलें खोना व बुंगया जनता प्रभावित जुया वयाच्वंगुलिं फास्ट ट्राय्कया जिरो प्वाइन्ट हिलेमाःगु सुझाव बियादीगु खः । सेनां फास्ट ट्राय्कया जिरो प्वाइन्ट खोनाय् तयेगु धयाच्वंगु दुसा स्थानीय वासिन्दां बुंगया फर्सिडोलय् जिरो प्वाइन्ट दयेकेमाःगु माग याना वयाच्वंगु दु । अथे जूसा म्हो जक जग्गा अधिग्रहण याःसां गाइगु खँ धाःगु दु ।
LEAVE YOUR COMMENTS