आइएसओ मान्यताया प्राप्त मानव मलमूत्र प्रशोधन केन्द्र

यल – महालक्ष्मी नगरपालिका–९ लामाटारय् दक्षिण एशियाय् हे न्हापांगु आइएसओ २४५२१ मान्यता प्राप्त मानव मलमूत्र फोहर प्रशोधन व व्यवस्थापन केन्द्र दयेकीगु जूगु दु । उगु नगरपालिका व काठमाडौं उपत्यका खानेपानी व्यवस्थापन बोर्डया मंकाः कुतः व लगानीइ उगु केन्द्र निर्माण जुइत्यंगु खः ।

केन्द्र निर्माणया निंतिं प्यंगू करोड १७ गू लाख ध्यबा लगे जुइगु अनुमान यानागु वातावरणविज्ञ राजेन्द्र श्रेष्ठं जानकारी बियादिल । वय्कलं धयादिल, ‘थुकी स्वंगूत्या करोड बोर्डया लगानी दइसा ५५ गू लाख नगरपालिकां व्यहारे यायेमाःगु जुइ ।’ केन्द्र संचालन यायेत थ्री फेजया विद्युत आवश्यक जुइगुलिं उकिया व्यवस्था नगरपालिका स्वयं हे यायेमाःगु श्रेष्ठं कनादिल ।

केन्द्रय् न्हिंं स्वंगू ट्रक दिशाजन्य पदार्थ व्यवस्थापन याये मिले जुइकथं निर्माण यायेत्यनागु वातावरण शाखा प्रमुख लवकुमार गुप्तां जानकारी बियादिल । वय्कलं धयादिल, ‘नगरपालिकाय् प्रत्येक वर्ष १० प्रतिशत जनसंख्या अप्वया वनाच्वंगुयात आधार कयाः सन् २०२१ निसें २१२५ तकयात जीकथं थुगु परियोजना न्ह्यःने यंकेत्यनागु खः ।

ई निरन्तर न्ह्याः वनाच्वंगु इलय् नेपालय् दंक व न्हूगु प्रविधि दुहां वल धाःसा उकियात सचालन यायेत थाकुइगु व भविष्ययात विचाः यानाः न्यादँ तकया निंतिं ज्या बीकथंया प्रशोधन व व्यवस्थापन केन्द्र निर्माण यायेत्यनागु गुप्तां कनादिल ।नगरवासीं उगु केन्द्रय् दिशाजन्य फोहर व्यवस्थापन यायेत व्यवस्थित सेफ्टीट्यांकी दयेकेमाःगु वातावरण तथा सरसफाइविज्ञ संजय अधिकारीं कनादिल ।

वय्कलं धयादिल, ‘थ्व स्वयां न्ह्यः आइएसओ मान्यता प्राप्त मजूगु झापाय् दयेकूगु लगभग न्हिं ७ ट्रक मलमूत्र भण्डारण याये मिले जूगु केन्द्र निर्माण जुइधुंकूगु दु । गबलें न्हिं भचा हे नं दिशाजन्य पदार्थ भण्डारण व प्रशोधन यायेत मवइगुलिं तसकं द्यापं फयाच्वंगु दु ।’ आः निर्माण जुइत्यंगु केन्द्र द्यापनय् वनेगु स्वयां नं न्यादँ तक कायम जुइगु व गुणस्तरीय जूसा हे उचित जुइगु अधिकारीं सुझाव बियादिल ।

दिशाजन्य पदार्थय् भ्यातनाः थेंज्याःगुलिइ ९० प्रतिशत लः व १० प्रतिशत पदार्थ दइगु याः । नगरपालिकाया १ निसें ५ तकया छेँखां पिहां वइगु दिशाजन्य पदार्थया लः छ्वयेत धःया व्यवस्था याःगु दु । वडा नं. ६ निसें १० तकया न्यागू वडाय् धःया व्यवस्थापन मजूगुलिं थ्व प्रशोधन केन्द्रं गाक्कं ग्वाहालियाइगु प्रमुख प्रशाकसकीय अधिकृत लक्ष्मीप्रसाद रेग्मीं कनादिल ।

वय्कलं धयादिल, ‘वडा नं. ६ निसें १० य् थौंकन्हय् लगभग ११ द्वः छेँखा दु । न्हापांगु ल्याखय् थुपिं छेँखाया दिशाजन्य फोहर व्यवस्थापन जुइसा ईया मागलिसें मेगु न्यागू वडाया दिशाजन्य पदार्थया व्यवस्था यायेत आवश्यक जूसा उकी नं विचाः यायेगु जुइ ।उगु प्रशोधन केन्द्र सामाजिक व्यापारिक नमूनाय् दयेकेबलय् प्रभावकारी जुइगु नगरपालिकाया प्रमुख रामेश्वर श्रेष्ठं कनादिल ।

वय्कलं धयादिल, ‘जिमिगु नगरपालिका दुने असल अभ्यासया शुरुवात जूगुलिं थ्व केन्द्र दयेकेगु निश्चित जूगु खः । थुकिया निंतिं नगरपालिकां जमिन क्वय् च्वंगु लः छक्वः अनुसन्धान यायेमाःगु तसकं आवश्यक खनेदु ।’ गोदावरी खुसिया कोरिडोर दयेकेधुंकाः थ्व ज्यायात न्ह्याकेगु नगर प्रमुख श्रेष्ठं जानकारी बियादिल ।

सम्बन्धित बुखँ

LEAVE YOUR COMMENTS