रुसं सेना लित सतःगु मखु, थप याःगु खः – अमेरिका

एजेन्सी- रुसं युक्रेनया सिमानाय् तैनाथ यानातःपि सेना लित सतागु धकाः धाःगु खँ गलत जूगु अमेरिकां दाबी याःगु दु । अमेरिकी अधिकारीं धाःकथं रुसं सेना लित सतूगु मखुसे अःखबतं न्हय्द्वः सेना थप याःगु खः । युक्रेनय् गुगुं नं इलय् हमला यायेत रुसं सेना लित सतागु धकाः हल्ला जक याःगु दावी अमेरिकाया दु । नेटों नं रुसं सेना लित यंकूगु प्रमाण मदुगु व युक्रेनय् आक्रमण यायेत सेनां तयारी यानाच्वंगु धाःगु दु ।

पश्चिमी अधिकारीतय्सं रुसं युक्रेनया सिमानां सेना लितयंकूगु प्रमाण मदु धयावयाच्वंसां रुसं धाःसाः युक्रेनया सिमानां सैन्य अभ्यास क्वचायेकाः थःपिनिगु सेना लिहां वयाच्वंगु धाःगु दु ।

रुसया रक्षा मन्त्रालयं क्रिमियां मस्कोय् हतियार ज्वनाः लिहां वयाच्वंगु सैन्य गाडीया भिडियो नं सार्वजनिक याःगु दु । युक्रेनं नं सेना लित यंकूगु धाःगु खालि वक्तव्य जक जूगु धाःगु दु । रुसया छम्ह कूटनीतिज्ञं धाःसा थ्व धापूयात रुसं हमला याइ धकाः ग्यानाच्वंगु युक्रेनयात हिस्टेरिया जूगु संज्ञा बिउगु दु ।