जुइ ला भारत–पाकिस्तान युद्ध ?

झिन्हु न्ह्यव भारत प्रशासित काश्मिरया पुलावामाय् जूगु आतंकवादी आक्रमण लिपा भारत व पाकिस्तान दथुइ तनाव तच्वया वयाच्वंगु दु । थ्व आतंकवादी आक्रमणय् लानाः भारतीय सुरक्षा बल सीआरपीएफया पीखुम्ह जवान सीगु खः । थ्व आक्रमण लिपा भारतीय जनतापाखें व राजनीतिक वृत्तं पाकिस्तान विरुद्ध कडा सः पिहां वयाच्वंगु दु ।

आक्रमणया छुं ई लिपा हे भारतपाखें थ्व आक्रमणय् पाकिस्तानया ल्हाः दुगु द्वपं बिउगु खः । आक्रमणया जिम्मा पृथकतावादी संगठन ‘जैश ए– मोहम्मदं’ काःगु दु । भारतं जैश ए मोहम्मद पाकिस्तान सरकारया ग्वाहालिं चले जुयाच्वंगु संगठन धया वयाच्वंगु दु । थ्व संगठनया प्रमुख मौलाना मसुद अजहर पाकिस्तानय् हे च्वनाच्वंगु दु ।

उकिं नं थ्व घटनायात कयाः भारतय् पाकिस्तान विरुद्ध तःधंगु आक्रोस दु । पुलावामाय् जूगु आक्रमण लिपा भारतीय प्रधानमन्त्री नरेन्द्र मोदीं पाकिस्तानयात हे लक्षित यानाः पृथकतावादी संगठन व वया ग्वाहालिमिपिंसं तःधंगु मू पुलेमाली धाःगु दु । अथेहे गृहमन्त्री राजनाथ सिंह थ्व घटनाय् पाकिस्तानया ल्हाः दुगु धकाः तप्यंक हे द्वपं बिसें कडा लिसः बीगु प्रतिक्रिया बिउगु दु ।

भारतीय मिडियाय् नं पाकिस्तानयाके ब्वला सायेमाःगु थेंज्याःगु सामग्री लगातार पिदनाच्वंगु दु । भारतीय नेतातय्गु धापूयात कयाः पाकिस्तानं पाखें नं कडा प्रतिक्रिया वयाच्वंगु दु । दकलय् न्हापां ला पाकिस्तानं भारतयात थ्व घटनाय् थःपिनि संलग्ना दुगु प्रमाण बीत धयाच्वंगु दु । लिसें यदि थःथाय् आक्रमण जुल धाःसा थःपिं नं सुम्क च्वनी मखु धाःगु दु ।

पाकिस्तान सेनां थःपिं भारतया छुं नं कथंया आक्रमणया लिसः बिइत तयार दु धयाच्वंगु दु । पुलावामा घटनायात कयाः भारतीय सरकार व नेतातय् कडा प्रतिक्रिया, जनताया आक्रोस व सामाजिक सञ्जाल व मिडियाय् वयाच्वंगु ब्वला सायेमाःगु थेंज्याःगु भावनां भारत–पाकिस्तान दथुइ थौंकन्हय् युद्धया स्थिति ब्वलनाच्वंगु दु ।

थ्व तनावया दथुइ भारत व पाकिस्तानया सेना गुगुं नं इलय् आमने–सामने जुइफुगु खतरा ब्वलनाच्वंगु दु । थज्याःगु अवस्था वयाच्वंसां छु धाथें भारत–पाकिस्तान दथुइ युद्ध जुइ ला धयागु न्ह्यसः नं ब्वलनाच्वंगु दु । भारत–पाकिस्तानया विभाजन लिपा काश्मिरयात कयाः थ्व निगू देय् दथुइ आःतक प्यक्वः युद्ध जुइधुंकूगु दु ।

अथेहे दयँदसं धयाथें हे सीमाय् निगू देय्या सेना दथुइ चिचिधंगु गोलावारी, आतंकवादी आक्रमण जुयाच्वंगु दु । पुलावामाया घटना लिपा मोदी सरकारयात पाकिस्तान विरुद्ध छुं यायेमाःगु दबाब लानाच्वंगु दु । तर थज्याःगु तनावया दथुइ भारत–पाकिस्तान युद्धया सम्भावना धाःसा तसकं म्हो हे जक दु । अन्तर्राष्ट्रिय समुदाय नं भारत–पाकिस्तान युद्धया पक्षय् मदु ।

अन्तर्राष्ट्रिय आतंकवाद मदयेकेगु निंतिं अन्तर्राष्ट्रिय समुदाययात गुलि भारतया साथ माःगु खः, उलि हे पाकिस्तान नं आवश्यक जू । अमेरिकायात व्यापारय् भारतया साथ माःसा अफगानिस्तानया मामिलाय् पाकिस्तानयात त्वःतेफइगु अवस्था मदु । मेगु शक्तिशाली देय् चीन ला तप्यंक हे पाकिस्तानया पक्षय् दु ।

भारतया बांलाःगु सम्बन्ध दुगु साउदी अरबया राजकुमारं ला पुलावामा घटना जूगु निन्हु लिपा हे पाकिस्तानय् वनाः अर्बौं डलर लगानी यायेगु सम्झौता यानाः वनेधुंकूगु दु । थज्याःगु अवस्थाय् भारतं एकपक्षीय रुपं पाकिस्तानय् आक्रमण यायेफइगु स्थिति मदु ।निदँ न्ह्यव भारत प्रशासित काश्मिरया उरीइ जूगु आतंकवादी हमला लिपा नं निगू देय् दथुइ थज्याःगु हे तनाव ब्वलंगु खः ।

उबलय् भारतीय सेनां पाकिस्तानी सीमाय् दुहां वनाः ‘सर्जिकल स्ट्राइक’ धकाः पृथकतावादीत सुलाच्वंगु थासय् आक्रमण नं यात । थ्व लिपा निगू देय् दथुइ युद्ध हे जुइ थेंज्याःगु तनाव ब्वलंगु खः, तर उबलय् नं युद्ध मजुल । निगुलिं देय्या नेतातय्सं थ्व खँ बांलाक हे सिउ कि आः युद्ध यानाः छुं निकासा पिहां वइमखु ।

युद्धविरोधीतय्सं आः नं धायेगु यानाच्वंगु दु कि – प्यक्वःतक जूगु युद्धं आखिर छु हे पिहां वल । उकिं भारत सरकार आः युद्धया विकल्पया रुपय् पाकिस्तानयात अन्तर्राष्ट्रिय समुदायं अलग यायेगु कुतलय् दु । अथेहे पाकिस्तान विरुद्ध आर्थिक प्रतिबन्ध तयेगु खँ भारतं धयाच्वंगु दु । थ्वहे दथुइ पाकिस्तानं तनाव म्हो यायेगु निंतिं भारतं धयाच्वं थें पाकिस्तानय् दुगु जैश ए मोहम्मद संगठनयात नियन्त्रण यायेगु पलाः ल्ह्वंगु दु ।

पाकिस्तानया पंजाबया बहालपुर धाःथासय् च्वंगु जैश ए मोहम्मदया मू ज्याकुथियात पंजाब सरकारं नियन्त्रण काःगु दु । थुकिं नं तनाव म्हो याइगु आशा याःगु दु । पुलावामा घटनायात कयाः भारतीय प्रधानमन्त्री लिसें नेतातय् पाखें वयाच्वंगु कडा धापूयात कयाः पाकिस्तानया विदेशमन्त्रीं धाःगु दु, ‘भारतीय प्रधानमन्त्रीयाके आः निगू विकल्प दु ।

छगू विकल्प खः– वय्कः छम्ह नेताया हे पहलं वइगु चुनावयात ध्यानय् तयाः कडा न्ववायेगु व थःगु नीति न्ह्यब्वयेगु । मेगु खः – छम्ह राजनेता कथं देय्या गरिबी व विकास बारे बिचाः यायेगु । थ्व धयागु क्षेत्रीय शान्ति व स्थिरतां जक चूलाकेफइ ।’आः धाथें भारतीय प्रधानमन्त्रीं पाकिस्तानी विदेशमन्त्रीं धाःगु निपु लँ मध्ये गुगु ल्यइ व धाःसा स्वये हे ल्यंदनि ।

सम्बन्धित बुखँ

LEAVE YOUR COMMENTS