युएई हिन्दी भाय्यात स्वंगूगु भाय्या मान्यता

संयुक्त अरब इमिरेट्स (युएई)य् न्याया प्रक्रियाया निंतिं हिन्दी भाय् स्वंगूगु औपचारिक भाय्या मान्यता बिउगु दु। आवंलि युएई अदालतय् नं हिन्दी भाय् छ्यलाबुलाय् वइगु जूगु दु । अरबी व अंग्रेजी धुंकाः हिन्दीयात स्वंगूगु भाय्या रुपय् औपचारिक मान्यता बिउगु खः ।

युएईया अदालतय् बिउगु छगू निवेदनया आधारय् अदालतं हिन्दी भाय्यात नं कामकाजया भाय्या रुपय् मान्यता बिउगु खँ भारतीय विदेशमन्त्री सुष्मा स्वराजं धाःगु दु । वय्कलं सामाजिक सञ्जाल ट्विटर मार्फत हिन्दी भाय्यात औपचारिक भाय् याःगुलिं अदालतयात प्रशंसा नं यानादीगु दु । युएईइ च्वनाच्वंपिं आप्रवासी मध्ये दकलय् अप्वः भारतीयत दु ।

उपिं अप्वःसिनं हिन्दी भाय् ल्हाइपिं खः । उकिं हिन्दी भाय्यात औपचारिक मान्यता बिउगु खः । युएईया कूल जनसंख्या ९० लाख दुसा थुकी आप्रवासीतय् ल्याः स्वब्वय् निब्वः दु । भारतीयतय् ल्याः जक २६ लाख दुगु अनुमान दु । थ्व धयागु मुक्कं जनसंख्याया ३० प्रतिशत जूवः । न्यायप्रक्रियाय् सुयातं समस्या मजुइमा धकाः हिन्दी भाय्यात मान्यता बिउगु खँ धाःगु दु ।