‘ईयु राष्ट्रत छप्पँ जुइमफुगुलिं युरोपय् महामारीया समस्या’

ऐजेन्सी – चीनया वुहानं सुरु जूगु कोरोना भाइरस (कोभिड-१९) विश्वन्यंक महामरीया रुप कायच्वंगु दु । चीनय् लगभग न्हूुगु संक्रमित मदयेधुंकूसां विश्वया मेमेगू देशय् थुगु भाइरसं तःधंगु क्षति यानाच्वंगु दु । चीन लिपा कोरोनाया केन्द्रविन्दु जूगु युरोपियन देशय् थुकिं तःधंगु समस्या हयाच्वंगु दु ।

युरोपय् दकलय् न्हापांगु संक्रमित लूगु लत्या लिपा अर्थात मार्च १३ तारिक कुन्हु अन विश्व स्वास्थ्य संगठनं युरोप कोरोनाया न्हूगु केन्द्रविन्दु धकाः घोषणा याःगु खः । युरोपया दकलय् बांमलाक लिच्वः लाकूगु इटालि व स्पेनय् आः तक १२ हजार स्वयां अप्व मनूतय् ज्यान वनेधुंकूगु दुसाः छगू लख स्वीद्वः स्वयां मनू संक्रमित जुयाच्वंगु दु । अले संक्रमिततय् ल्याः न्हिया न्हिथं अप्व जुयाः वनाच्वंगु दु ।

युरोप थज्याःगु अतिविकसित राष्ट्रत दुगु देशय् थज्याःगु अवस्था छाय् वल धकाः आः थीथी कोणं विश्लेषण यायेगु ज्या सुरु जूगु दु । उकी नं विश्वय् तसकं आधुनिक स्वास्थ्य सुविधा दुगु देशय् तकं सीपिनि ल्याः थुलिभनं अप्व जूगु दु ।

थ्वहे दथुइ युरोपियन कमिसनया सभापति अस्लो भेन्डरलानं युरोपियन देय्त छप्पँ जुयाः कोरोनाया सामना यायेमफुगुलिं थौंया समस्या वःगु दावी यानादीगु दु । बिहीवाः युरोपियन संसदय् न्ववानादिसें भेन्डरलानं धयादिल, ‘ईयु राष्ट्रत छप्पँ जुयाः ज्या यायेमफुगुलिं थौंया समस्या वःगु खः उकीं फुक्क ईयु राष्ट्रयात एक्यबद्धता क्यनेत इनाप यानाच्वना ।’

थज्याःगु समस्याया इलय् नं ईयुया राष्ट्रतय्सं थःगु देय्या बाहेक मेगू देशया बारे बिचाः यानामच्वंगु धासें युरोपियनतय् दथुइ अविश्वास ब्वलनाच्वंगु दु । जर्मन व फ्रान्सं कोरोनाया वासः यायेगु ज्याय् संलग्न जुइपिं स्वास्थ्यकर्मीतय्त माःगु अत्यावश्यक सामानत थःगु देसं पिने निर्यात यायेत प्रतिबन्ध तयेधुंकाः थज्याःगु अविश्वास झन् अप्वःगु खः ।

थ्वहे खँयात वाःचायेकाः सभापति भेन्डरलानं धयादी, ‘सु नं देय् याकःचा च्वना थ्व समस्याया समाधान यायेफइमखु । गुगु नं ईयुया राष्ट्रं थ्व संकटया सामना याकःचां यायेफइमखु । थ्व झी फुक्कसियां मंकाः दायित्व खः ।’

भेन्डरलानं ईयुया फुक्क राष्ट्र मिले जुयाः ज्या यायेफुसा जक फुक्क देय्यात ग्वाहालि जुइगु स्पष्ट यानादिल । वय्कलं धयादिल, ‘ईयुया छगू राष्ट्रं मेगू राष्ट्रयात ग्वाहालि यायेफुसा जक झीसं थःत ग्वाहालि यायेफइ ।’

(ने. सं. ११४० चौलाथ्व ३ / वि. सं २०७६ चैत १४, शुक्रवाः)

सम्बन्धित बुखँ

LEAVE YOUR COMMENTS