
येँ – कोरोना भाइरस (कोभिड-१९)या कारणं अमेरिकाय् सीपिनि ल्याः ५० हजार २ सय ४३म्ह थ्यंगु दु ।
विश्वन्यकं महामारी जुयाच्वंगु कोरोनाया कारणं अमेरिकाय् आः तक ८ लख ८६ हजार ७ सय ९म्ह मनूत संक्रमित जूगु दु । वंगु छवाःया दुने जक थन २ लख अप्व मनूत संक्रमित जूगु खः । कोरोनाया संक्रमण लानाः अस्पतालं छेँ लिहांवंपिं धाःसा ८५ हजार ९ सय २२म्ह थ्यंगु दु । अमेरिकाय् दकलय् अप्व न्यूयोर्कय् २ लख ६८ हजार मनूत संक्रमित जूगु दुसा २० हजार ८ सय मनूत सीधुंकूगु दु ।
अमेरिकाय् कोरोना भाइरसया संक्रमण तच्वया वनेवं अन सरकारं ४ खर्ब अमेरिकी डलर बारबरया राहत प्याकेज हयेत्यंगु दु । अमेरिकी सिनेटं बिहीवाः पारित याःगु राहत प्याकेज विशेष यानाः चिधंगु व्यवसाय, अस्पताल व कोभिड-१९ नाप ल्वायेगु निंतिं माःगु सामानया निंतिं छ्यलीगु जूगु दु ।
अथेहे अमेरिकां बेरोजगारतय्त नं राहत बीगु धकाः थ्वस्वयां न्ह्यः हे घोषणा याःगु खः । अज्याःगु राहत कायेगु निंतिं २ करोड ६० लख मनूतय्सं आवेदन बीधुंकूगु दु ।
LEAVE YOUR COMMENTS