सिरियाय् विषालु ग्यास छ्यःगु अनुमान

उत्तरी सिरियाया विद्रोही नियन्त्रित इड्लिब प्रान्तय् सिरियाली सरकारं विषालु ग्यास कयेकूगु खँ पिहां वःगु दु । अन सिरियाली सरकारं हवाई आक्रमण तच्वया हयाच्वंगु दु । थ्व झ्वलय् विषालु ग्यास कयेकूगु खँ पिहां वःगु खः । सर्गतय् हेलिकप्टय् वःबलय् छगू कथंया ह्वास्स न्ववाःगु स्थानीयवासी व स्वास्थ्य सम्बन्धी कर्मचारीतय्सं धाःगु दु । थ्वहे दथुइ सराकेश शहरय् झिंन्याम्ह नागरिकयात अस्पताल हःगु खँ छम्ह चिकित्सकं धाःगु दु ।

उम्ह चिकित्सकया कथं क्लोरिनया गन्धया कारणं उमित सासः ल्हायेत व मिखा पालुइगु समस्या खनेदुगु खः ।मेखे थ्व शहर लिक्कसं मेगु छगू गामय् हवाइ आक्रमणय् लानाः खुम्ह सीगु खँ धाःगु दु ।थ्वहे दथुइ विपक्षी फौजविरुद्ध रसायनिक हतियार छ्यल धकाः अमेरिकां बिया वयाच्वंगु द्वपंयात धाःसा सिरियाली सरकारं खण्डन याःगु दु । वंगु महिनाय् दमास्कसं पिने लाःगु पूर्वी गुटाय् विद्रोहीत विरुद्ध जूगु रकेट आक्रमण लिपा अन नीम्हं मल्याक मनूतय्त सासः ल्हायेत समस्या वःगु खः ।