ने. सं. ११४४ कौलाथ्व पारू - नःलास्वनेगु

मानन्धर व्यायाम मन्दिरया रजत महोत्सव

ख्वप – मानन्धर व्यायाम मन्दिरया रजत महोत्सव थीथी व्यक्तित्वपिंत सम्मान व प्रवचन लगायत थीथी ज्याझ्वः यासें हन । व्यायाम मन्दिरया नायः तुल्सिकाजी मानन्धरया सभापतित्वय् जूगु ज्याझ्वःया उलेज्या मूपाहां नेमकिपया केन्द्रीय सचिव नापं सांसद प्रेम सुवालं यानादीगु खः । सांसद सुवालं देय् व जनताया पक्षय् प्रतिवद्ध जुयाः ज्या याना वनेगु उद्देश्यं हे थःपिं सदनय् वनाच्वनागु खः धयादिल ।

विशेष पाहांकथं झायादीम्ह नेपाःया नांजाःम्ह अन्तर्राष्ट्रिय धावक बैकुण्ठ मानन्धर, केन्द्रीय मानन्धर संघया सचिव गजेन्द्रमान मानन्धर नापं नेमकिपाया केन्द्रीय दुजः नापं ९ वडा अध्यक्ष रविन्द्र ज्याख्वः, पुलांम्ह वडा अध्यक्ष विष्णुबहादुर मानन्धर, भक्तपुर उद्योग वाणिज्य संघया उपाध्यक्ष शिवप्रसाद मानन्धर, नेपाल मानव अधिकार संगठन ख्वप कचाया अध्यक्ष रामकृष्ण मानन्धरपिंसं नं नवानादीगु खः ।उगु हे ज्याझ्वलय् मूपाहां सुवालं स्थानीय तहया निर्वाचनय् ९ वडाय् निर्वाचित जनप्रतिनिधिपिंत सम्मान नं यानादीगु खः ।

थ्व हे झ्वलय् रजत महोत्सव समापनया झ्वलय् किशोर मानन्धरया अध्यक्षताय् ब्यायाम मन्दिरया न्हूगु ज्यासना पुचःया नं ल्यज्या जूगु खः । मानन्धरया अध्यक्षताय् गठन जूगु झिंन्याम्हेसिया न्हूगु ज्यासना पुचलय् ज्ञानबहादुर मानन्धर उपाध्यक्ष, अष्टलाल मानन्धर सचिव, तीर्थकाजी मानन्धर सहसचिव व चन्द्रबहादुर मानन्धर कोषाध्यक्षय् च्वनादीगु दु ।