‘बागमति’ विरुद्ध तामाङ समुदाय नं आन्दोलित

येँ – प्रदेश ३ या नां ‘बागमति’ तयेगु धकाः सत्तारुढ दल नेकपां याःगु निर्णययात ताम्सालीङ संयुक्त संघर्ष समितिं विरोध याःगु दु । समितिया नायः जय गोले तामाङया नामं म्हिगः छगू वक्तव्य पिकासें नेकपाया थ्व निर्णय प्रदेश ३ या जनताया चाहना कथं मखुगु जुयाः ‘नेवाः ताम्सालिङ’ हे थ्व प्रदेशया नां जुइमाःगु माग हानं लिसा काःगु दु । नेकपाया थ्व निर्णय नेपाःया संविधानया बर्खिलाप जूगु लिसें प्रदेश सभाया अधिकारय् जूगु हस्तक्षेप खः धकाः नं स्पष्ट यानातःगु दु ।

नेवाः–ताम्सालिङ प्रदेश जुइमाः धकाः प्रदेश सभाय् प्रस्ताव समेत दर्ता जुइधुंकूगु अवस्थाय् उगु प्रस्तावय् मतदान समेत मयाकुसे थःगु निर्णय लादे याकेत्यंगु द्वपं नं समितिं बिउगु दु । नेकपापाखें प्रदेश ४ य् थें पञ्चायती नांयात हे हानं म्वाकेगु कुतः यासें बागमति प्रदेश नामाकरण यायेत्यंगु खः धासें नेकपां याःगु थ्व निर्णयया पलेसा प्रदेशया ऐतिहासिक सभ्यता व पहिचानया सम्मान यासें ‘नेवाः–ताम्सालिङ’ तयेत ग्वाहालि यायेत नं सकलें सांसदतय्त इनाप यानातःगु दु ।

नेकपापाखें याःगु थ्व निर्णयया कारणं छुं अप्रिय परिस्थिति सिर्जना जुल धाःसा उकिया जिम्मेवार थःपिं मजुइगु खँ नं वक्तव्यय् धयातःगु दु । ताम्सालिङ संयुक्त संघर्ष समितिइ तामाङ जातिया लागिं आन्दोलनरत च्यागू थीथी घटक दुजः जुयाच्वंगु दु । बागमति प्रदेश तयेगु नेकपाया निर्णय विरुद्ध स्वनिगःया थीथी नेवाः खलःपुचःतय्सं सतकय् कुहां वयाः विरोध शुरु यायेधुंकूगु दु ।