मरुसतःया नक्सा विज्ञपाखें अध्ययन सुरु

येँ – येँया मरु सतः दयेकेगु नमूनाय् त्रुटि जू–मजू स्वयेत विज्ञपिंसं अध्ययन यानाच्वंगु दु । मरु सतःया पुनःनिर्माणया निंतिं तयार यानातःगु नक्साय् जुइफइगु कमिकमजोरी पाखे विज्ञपिंसं अध्ययन यानाच्वंगु खः ।

थ्वहे झ्वलय् मरुसतः पुनःनिर्माण समितिया अध्यक्ष व ३ नं. प्रदेशया सांसद राजेश शाक्यं लछिया दुने पूर्ण रुपं मरुसतः पुनःनिर्माणया ज्या खनेदइ कथं न्ह्याइगु खँ धयादीगु दु । वय्कःया कथं थ्व ऐतिहासिक सम्पदा जूगुलिं फुकसिया बिचाः दुथ्याकेमाःगु कारणं निर्माण ज्या न्ह्याकेत छुं भचा लिबाना च्वंगु खः ।

तःभुखाचं पूर्ण रुपं क्षति जूगु मरुसतः पुनःनिर्माणया निंतिं वंगु वैशाख ३१ गते क्षमा पुजा याःगु खः । वइगु भदौया न्हापांगु वाःनिसें पुनःनिर्माण यायेगु कथं तयारी जुयाच्वंगु खँ वय्कलं धयादीगु दु । उकिया निंतिं पुनःनिर्माणय् छ्यलीगु अप्पा व चाया गुणस्तर परीक्षणलिसें सतः दयेकेगु निंतिं माःगु सिँ मुंकेगु ज्या जुयाच्वंगु खँ नं वय्कलं कनादिल ।

मरुसतः पुनःनिर्माण ज्या जनस्तरं न्ह्याकेगु निंतिं भाजु शाक्यया अध्यक्षता पुनःनिर्माण समिति नीस्वनातःगु खः । पुनःनिर्माण ज्या न्ह्याकेत येँ महानगरपालिकां ५०लाख तका बीधुंकूगु दु ।