ललितपुर तयारी पोशाकं रजत जयन्ती हनीगु

यल(नेपालभाषा टाइम्स)- ललितपुर तयारी पोशाक संघं रजत जयन्ती हनीगु जूगु दु । संघं थःगु स्थापनाया २५ दँ क्यंगु लसताय् रजत जयन्ती हनेत्यंगु खः । संघं आः नकतिनि छगू पत्रकार सम्मेलन यासें थुकिया जानकारी बिउगु खः ।

पत्रकार सम्मेलनय् बिउगु जानकारीकथं संघं रचनात्मक, जनचेतनात्मक व सामाजिक व व्यवसायीतय् सहजतायात ध्यानय् तयाः थीथी ज्याझ्वः यासें रजत जयन्ती हनेत्यंगु खः ।संघं ग्वसाः ग्वःगु पत्रकार सम्मेलनय् रजत जयन्तीया झ्वलय् आयकर सम्बन्धी अन्तरक्रिया, व्यावसायिक लेखा प्रणाली तालिम, बैंक व बीमा सम्बन्धी सहजीकरण, सु स्वास्थ्यया निंतिं थीथी ज्याझ्वः, असहाय, अपांगतालिसें ज्येष्ठ नागरिकया निंतिं थीथी कथंया ग्वाहालि, अन्तर सघं खेलकुद, स्मारिक प्रकाशन मोहनि, स्वन्ति नखःया इलय् थीथीकथंया उपहार योजनालिसें सदस्यता वृद्धि थेंज्याःगु ज्याझ्वःत यायेगु जानकारी बिउगु दु ।

थौ स्वयां २५ दँ न्ह्यः यल जिल्ला केन्द्रीत जुयाः वसः (पोशाक), ब्याग, कस्मेटिक लगायतया व्यवसाय यानाच्वंपिं व्यवसायीतय्त संगठित यायेगु उद्देश्यं पुष्परत्न शाक्यया अध्यक्षताय् संघया स्थापना याःगु खः ।

संघया अध्यक्ष मिलन श्रेष्ठं पे्रस विज्ञप्ती ब्वनाः न्यंकादीगु पत्रकार सम्मेलनय् संस्थापक अध्यक्ष शाक्यं संघया इतिहासया बारे कुलादीगु खःसा न्हापांम्ह उपाध्यक्ष शेरबहादुर महर्जनं सुभाय् देछानादीगु खः ।