भेनेजुएला संकट स्पेन, फ्रान्स व स्वीडेनं गुइदोयात समर्थन

भेनेजुएलाया राष्ट्रपति निकोलास मदुरों थःगु देशय् गृहयुद्ध फँसे जुइफुगु खँ धयादीगु दु । आइतवाः स्पेनया टेलिभिजनय् अन्तर्वार्ता बिसें वय्कलं धयादीगु दु, ‘देश गृहयुद्धय् वनी कि मवनी धयागु खँ अमेरिका व वयात समर्थन यानाच्वंपिं देय्तय् क्रियाकलापय् निर्भर जुइ ।’
राष्ट्रपति मडुरों अमेरिकी राष्ट्रपति डोनाल्ड ट्रम्पं भेनेजुएलाया आन्तरिक मामिलाय् हस्तक्षेप यात धाःसा ट्रम्पं हिं जाःगु ल्हाः ज्वनाः ह्वाइटहाउस त्वःतेमालीगु ख्याच्वः नं बियादीगु दु ।

राष्ट्रपति मदुरों भेनेजुएलाय् हस्तक्षेप यायेत स्वःगु धासें अमेरिका व अमेरिकाया समर्थक देय्तय् कडा आलोचना नं यानादीगु खः ।मेखे विपक्षी नेता हुँवा गुइदों छगू अन्तर्राष्ट्रिय गठनबन्धन दयेकाः देय् दुने मानवीय ग्वाहालि दुत हयेगु खँ धयादीगु दु । वंगु महिनाय् गुइदों थःत भेनेजुएलाया राष्ट्रपति जूगु घोषणा यानादीगु दु ।

विपक्षी नेतायात अमेरिका लिसें दक्षिण अमेरिकाया तःगू देशं समर्थन यायेगु धायेवं अनया विवाद तच्वया वंगु खः । थ्वहे दथुइ स्पेन, फान्स व स्वीडेनं नं गुइदोयात समर्थन याःगु दु । युरोपेली देतय्सं राष्ट्रपति मदुरोयात च्यान्हुया दुने निर्वाचन घोषणा यायेत बिउगु ख्याच्वः मन्यनेवं स्पेनलगायतया देशं गुइदोयात अन्तरिम राष्ट्रपति कथं समर्थन यानागु खँ धाःगु दु ।

राष्ट्रपति मदुरों अन्तर्वार्ताया झ्वलय् युरोपेली संघं न्ह्यःने हःगु आम निर्वाचनया प्रस्तावयात अस्वीकार यानादीगु खः । राष्ट्रपति मदुरों भेनेजुएलाय् विदेशी शक्ति राष्ट्रतय् कारणं परिस्थिति असहज जुया वनाच्वंगु व कन्हय् वनाः स्थिति थप स्यना वन धाःसा सुनां नं नियन्त्रण यायेमफइगु अवस्थाय् थ्यनीगु दावी वयेकलं यानादीगु दु ।