सरकारं मधेशया शहीदयात ल्वःमंकल

येँ -मधेसय् जूगु थीथी आन्दोलनय् घाःपाः जूपिं व सीपिं मनूतय् छेँजःपिंसं आः याकनं हे आन्दोलन पीडिततय्गु छगू भेला सःतेगु तयारी यानाच्वंगु खँ सीदुगु दु । मधेस आन्दोलन लिपा सरकारय् वःपिं मधेसवादी पार्टीत व सरकारं थःपिंत वास्ता मयाः धासें सकस्यां ध्यान साला कायेगु लागिं पीडिततय्सं थ्व भेला यायेत्यंगु खः ।
मधेस आन्दोलनय् तराई लागाया आपालं मनूतय् ज्यान वंगु खः । तर आन्दोलन लिपा सरकार वा पार्टीया नेतात सुनानं छेँय् वयाः बुझे तकं याः मवःगु द्वपं उमिसं बिउगु दु ।

आन्दोलनय् शहीद जूपिंत अबले हे सरकारपाखें बिउगु ध्यबा बाहेक मेगु आः तक छुं हे मबिउगु द्वपं नं उमिसं बिउगु दु । दकलय् घाःपाः जुयाः आः तक वासः याकाच्वंपिं पीडिततय्त धाःसा प्रदेश सरकारं नं वास्ता मयाःगु उमिगु द्वपं दु । आः तक घाःपाः जुयाः वासः याकाच्वंपिं मनूतय्त खर्च हे यायेत थाकुयाच्वंगु दुसां सरकारं धाःसा वास्ता मयाः धासें आन्दोलन लिपा थःपिंत ल्वःमंका छ्वःगु खँय् उमिसं दुःख प्वंकूगु दु ।

२ नम्बर प्रदेशय् सरकार गठन जूगु न्हापांगु न्हि कुन्हु हे छम्ह शहीद छगू रोजगार यायेगु निर्णय यासें शहीदया परिवारयात ज्या बीगु शुरु याःगु खः । सरकारं अबले शहीद जूपिं धकाः ६२ म्हेसिया नां वःगु वः उलि मनूयात रोजगारी बीधुनागु खँ धाःसां आन्दोलनय् परिवार गुमे याःपिं गुलिखे मनूतय्सं धाःसा आः तक थःपिनि सुं हे छेँजःपिंसं जागिर नये मखंगु गुनासो यानाच्वंगु दनि ।

वीरगंजय् प्रहरीया गोलीं लानाः सीम्ह शहीद शुत्रधन पटेलया शालीक तयेगु धकाः दत्या न्ह्यः दयेका हःगु खःसां आः तक धस्वाके मफयाः शालीक लँय् तुं वानातःगु कारणं नं सरकारं शहीदपिंत ल्वःमंकूगु खनेदु धाःगु दु । थुपिं हे खँय् सहलह यायेत मधेस आन्दोलन पीडिततय्सं भेला यायेत्यंगु खः धाःगु दु ।

सम्बन्धित बुखँ

LEAVE YOUR COMMENTS