ने. सं. ११४३ चौलाथ्व तृतीया -

थनिंनिसें गुक्वःगु राष्ट्रिय कला प्रदर्शनी

येँ- नेपाल ललितकला प्रज्ञा प्रतिष्ठानया ग्वासलय् थनिंनिसें गुक्वःगु राष्ट्रिय कला प्रदर्शनी शुरु जू वनाच्वंगु दु । थनिंनिसें वइगु बैशाख १७ गतेतक न्ह्याःगु प्रदर्शनीया निंतिं देय्न्यंकंया कलाकारतय् कलाकृति संकलन यायेगु ज्या क्वचाःगु दु । थ्व झ्वलय् देय्न्यंकंया २७७ म्ह कलाकारया ३२५ कलाकृति संकलन जूगु प्रतिष्ठानं जानकारी बिउगु दु । उगु कला प्रदर्शनीइ देय्न्यंकंया कलाकारतय्सं सृजना याःगु आधुनिक व परम्परागत शैलीया चित्रकला, आधुनिक व परम्परागत मूर्तिकला, लोककला, हस्तकला लगायत मेमेगु कला सृजना संकलन याःगु दु ।

कला प्रदर्शनीइ ब्वज्या जुइगु सृजना कलाकारतय्सं वंगु निदँया दुने रचना वा सृजना याःगु जुइमाःगु व थ्व स्वयां न्ह्यः गुगुं नं राष्ट्रियस्तरया ब्वज्याय् समावेश मजूनिगु जुइमाःगु व्यवस्था यानातःगु दु । कला ब्वज्या सफलतापूर्वक सम्पन्न यायेत छगू ६७ म्हेसिया छगू मूल समारोह समिति नं गठन यानातःगु दु ।

कला ब्वज्याय् प्रत्येक विधाय् सिरपाःया नं व्यवस्था यानातःगु दु । प्रतिष्ठानया प्राज्ञ सुष्मा राजभण्डारीं बियादीगु जानकारीकथं प्रत्येक विधाय् छम्हेसित ख्वीद्वः तका दांया राष्ट्रिय ललितकला सिरपाः व निम्हेसिन नीन्याद्वः तका दांया विशेष सिरपाःया व्यवस्था यानातःगु दु । अथे हे प्रत्येक प्रदेशं छम्ह छम्हेसित नीन्याद्वःतकाया प्रदेश विशेष सिरपाःया नं व्यवस्था नापं नीन्याद्वः तका दांया हे ललितकला लेखन सिरपाः व ललितकला पत्रकारिता सिरपाः नं बीगु व्यवस्था यानातःगु दु ।

प्रतिष्ठानया कुलपति केके कर्माचार्यलिसें वरिष्ठ कलाकार शशिविक्रम शाह, शंकरनाथ रिमाल, शंकरराजसिंह सुवाल, उत्तम नेपाली लगायत स्वीम्हेसिया कलाकृति नं संकलन यानाः ब्वज्याय् तयातःगु दुसा वय्कःपिनिगु कलाकृति प्रतिपस्र्धाय् धाःसा दुथ्याकातःगु मदु ।