विमानस्थलं अझं छगूत्या अर्ब ध्यबा म्हयेमफुनि

येँ – त्रिभुवन अन्तर्राष्ट्रिय विमानस्थलं वंगु झिंछलाया दुने ५५ करोड स्वयां अप्वः बक्यौता म्हयेत ताःलाःगु दु । मंसिर मसान्त तकया दुने थीथी वायुसेवा कम्पनीपाखें थ्यंमथ्यं ५० करोड व पुस महिनाय् थ्यंमथ्यं न्हय्गू करोड बक्यौता म्हयागु खँ विमानस्थल कार्यालयं धाःगु दु ।विमानस्थलपाखें अझं थथिी कम्पनीपाखें छगूत्या अर्ब ध्यबा म्हये ल्यं दनि ।

थुकी दकलय् अप्वः ध्यबा पुलेमाःपिंलय् सरकारी निकाय भन्सार विभाग, नेपाल वायुसेवा निगम लिसें थीथी निजी हवाई कम्पनीत दु । भन्सार विभागं जक ५५ करोड पुले ल्यं दनिसा नेवानिं ४० करोड धयाथें पुले ल्यं दनि । निगमं किस्ताबन्दीं ध्यबा पुलाच्वंसां भन्सार विभागं धाःसा आःतक ध्यबा मपूनिगु खँ धागु दु । नेपाल नागरिक उड्डयन प्राधिकरण (क्यान)या विमानस्थल सेवा शुल्क नियमावली कथं खुइन्हुया दुने ध्यबा मपुल धाःसा उगु एयरलाइन्सया उडान दिकेगु व जहाज ग्राउण्डेड यायेगु प्रावधान दु ।

विमानस्थलं विकास शुल्क, ल्यान्डिङ्ग व पार्किङ्ग शुल्क, हवाइ परिवहन, सुरक्षा, कार्यालय संचालन क्वथा, काउन्टर, होडिङ बोर्डया शुल्क कायेगु निंतिं विमानस्थल दुने संचालन यानाच्वंगु पसः, भण्डारण, यात्रुयात सेवा प्रवाह लगायतया शुल्क कायेगु याइ ।एयर एशियां २१ करोड मपूनि मलेसियाया बजेट एयरलाइन्स एयर एशियां अझं विमानस्थलय् पुले ल्यं दनिगु २१ करोड मपूनिगु खँ धाःगु दु ।

एयर एशियां न्हय्गू करोड ५० लाख साँवाय् विलम्ब शुल्क जक १३ करोड पुले ल्यं दनि ।क्वालालाम्पुर–येँ सिधा उडान यानाच्वंगु थ्व कम्पनीं विमानस्थलया बक्यौता हे मपुसे सेवा बन्द यायेधुंकूगु दु । विमानस्थलया महाप्रबन्धक राजकुमार क्षेत्रीया कथं एयर एशियां बियातःगु न्हय्गू करोडया चेक नं बाउन्स जूगु खः । चेक बाउन्स प्रकरणय् विमानस्थलया तत्कालिन कर्मचारीतय् नं ल्हाः दुगु धासें प्राधिकरणं छानविन यानाच्वंगु दु ।

महाप्रबन्धक क्षेत्रीं बाउन्स जूगु चेक बियाः कम्पनीया नेपाः एजेन्ट हरिमान लामा नं वंगु खुला न्ह्यवनिसें सम्पर्कय् मदुगु खँ धाःगु दु ।हिमालय एयरलाइन्सयात अल्टिमेटम अन्तर्राष्ट्रिय उडान याना वयाच्वंगु हिमालय एयरलाइन्सयात विमानस्थलं सेवा शुल्कवापतया ध्यबा पुलेत लछिया अल्टिमेटम बिउगु दु ।

लछिया दुने ध्यबा मपुल धाःसा उडान बन्द यानाबीगु ख्याच्वः सहित पौ छ्वयेधुंकाः एयरलाइन्सं याकनं ध्यबा पूवयेगु आश्वासन बिउगु खँ धाःगु दु । हिमालयन पाखें १४ करोड तका काये ल्यं दनि । कम्पनीं वंगु पुसा अन्तिम वालय् ५० लाख तका भुक्तानी यानाः ल्यं दुगु ध्यबा लछि दुने पूवयेत ई फ्वंगु खः ।

रासस

च्वमिया मेमेगु

• कोरोनां मानसिक समस्या अप्वयेकल
• पन्ति नीन्यादँलिपा विश्व सम्पदा धलखय्
• स्कुलय् वान्तवा भाय्
• बुंगद्यःया देगः निर्माण सिँ मदयाः अलपत्र
• ६०० म्ह डाक्टरयात कोरोना संक्रमण