साउनं निसें द्वःछिं अप्वः पारिश्रमिक भुक्तानी यायेत अनिवार्य प्यान

येँ – सरकारं वइगु आर्थिक दँ निसें कर्मचारी व ज्यामितय्त बिइगु पारिश्रमिक भुक्तानी प्यान अनिवार्य लागू याःगु दु । सरकारं स्थायी लेखा नम्बर (प्यान) मदुपिं कर्मचारी वा ज्यामितय्त पारिश्रमिक बीबलय् द्वछिं अप्वः जुल धाःसा अनिवार्य प्यान दयेमाःगु व्यवस्था याःगु दु । यदि प्यान नम्बर मतसे द्वःछिं अप्वं भुक्तानी जुल धाःसा उकियात खर्च कथं क्यने दइमखु धाःगु दु ।

थ्व व्यवस्था लिसें आः छुं नं कम्पनीं थः ज्यामि वा कर्मचारीयात बीमाःगु पारिश्रमिक बैंकपाखें हे भुक्तानी यायेमाःगु नं जूगु दु । थथे भुक्तानी यायेबलय् प्यान नम्बर नं दुथ्याकेमाः । थथे बैंक पाखें भुक्तानी याइबलय् कम्पनीं बियाच्वंगु पारिश्रमिकया यथार्थ विवरण सरकारं सीकेफइगु व थुकिं यानाः आयकर छले यायेगु सम्भावना मदइगु खँ धाःगु दु ।

अथेहे थुकिं यानाः कम्पनीतय्सं थः ज्यामि व कर्मचारीतय्त सरकारं तोके यानातःगु न्यूनतम तलब बिउ कि मबिउ धयागु नं सीदइगु खँ धाःगु दु ।मेखे सरकारं हःगु थ्व व्यवस्था कार्यान्वयन यायेत तसकं थाकुइगु खँ रोजगारदातातय्सं धाःगु दु ।

नेपाल उद्योग वाणिज्य महासंघया वरिष्ठ उपाध्यक्ष व रोजगारदाता परिषदया पुलांम्ह संयोजक शेखर गोल्छां सरकारं हःगु व्यवस्था व्यावहारिक मजूगु धासें तत्काल कार्यान्वयन यायेगु पलेसा छुं ई लिछ्यायेमाः धयादीगु दु ।

‘थ्व व्यवस्था कार्यान्वयन याये तसकं थाकु, न्हियान्हिथंया ज्यालादारीइ ज्या यानाच्वंपिं यक्वसिनं प्यान कयातःगु दइमखु व उमिसं प्यान धयागु छु धकाः तकं मसिउ’ धासें वय्कलं न्ह्यसः तयादीगु दु, ‘अथेहे नेपालय् वैध रुपं हे न्यागू लाख भारतीय ज्यामितय्सं ज्या यानाच्वंगु दु, उमित गुकथं प्यानया दायरया हयेगु, व गुकथं भुक्तानी यायेगु ?’

सरकारं हःगु थ्व व्यवस्थां ज्यामितय्त ज्या हे याकेमफइगु खँ धयाच्वंगु दु । ‘सिंहदरबार दुने ठेकेदारपाखें ज्या यानाच्वंगु ज्याय् हे गुलिखे भारतीय ज्यामि परिचालन जुयाच्वंगु दु, म्होतिं नं व ला स्वये माल नि’ वय्कलं धयादीगु दु । उपाध्यक्ष गोल्छां थ्व व्यवस्था लागु यायेत छुं ई बीमाःगु व सहुलियत बीमाःगु खँ नं धयादीगु दु ।

आन्तरिक राजश्व विभागया उपमहानिर्देशक यज्ञप्रसाद ढुंगेलं धाःसा सरकारं अध्ययन यानाःहे थ्व व्यवस्था हःगु धासें साउन निसें कार्यान्वयनय् वइ धयादीगु दु । ‘अध्ययन हे मयासे हयागु मखु, जिमिसं सुधार यायेत स्वयागु खः, सुधार याये धयागु गन अःपुइ धकाः ?’ अःखबतं ढुंगेलं न्ह्यसः तयादीगु दु ।

सम्बन्धित बुखँ

LEAVE YOUR COMMENTS