निर्माण व्यवसायीतय्पाखें बालुवाटारय् धर्ना

येँ – निर्माण व्यवसायीतय्सं सोमवाः प्रधानमन्त्री निवास बालुवाटारय् धर्ना बिउगु दु । नेपाल निर्माण व्यवसायी महासंघया आह्वानय् निर्माण व्यवसायीतय्सं ठेक्काया म्याद थप यायेमाःगुसहित थीथी माग तयाः धर्ना बिउगु खः । ब्यवसायी मैत्री ऐन थौंया आवश्यक्तता, एकपक्षी रुपं व्यवसायीतय्त जक दोष बीगु ज्या बन्द या, निर्माण व्यवासयीतय्त संरक्षण याः धयागु माग तयाः सुथय् साढे ९ बजे निसें घौछि तक प्रधानमन्त्री निवासय् धर्ना बिउगु खः ।

सरोकार निकायं वास्ता मयाःगुलिं थःपिं थुकथं प्रधानमन्त्री निवासय् हे वयाः धर्ना बिउ वयेमाःगु खँ महासंघं धाःगु दु । महासंघया अध्यक्ष रवि सिंहं थःपिनिगु माग बारे भौतिक पूर्वाधार तथा यातायात मन्त्री व सार्वजनिक खरिद अनुगमन कार्यालयया सचिवयात न्हापा हे जानकारी बीधुनागु खँ धयादीगु दु ।

वय्कलं आः छवाःतक निरन्तर थुकथं हे धर्ना बिइगु धासें निर्माण व्यवसायय् हे अस्तव्यस्त जुयाः देयय अर्थतन्त्रय् हे समस्या वःगुलिं थःपिं आन्दोलनय् कुहां वयेमाःगु खँ धयादिल ।

आन्दोलनया झ्वलय् माइतीघर मण्डला लिसें थीथी सतकय् हाकुगु ध्वाँय् सहित शान्तिपूर्ण प्रदर्शन यायेगु, निर्माण व्यवसायीतय् वर्ग कथं चरणवद्ध रुपं इजाजतपत्र सरकारयात लःल्हायेगु, हेभी इक्युपमेन्ट सहित सतकय् प्रदर्शन यायेगु, बोलपत्र पूवंक बहिष्कार यायेगु थेंज्याःगु ज्याझ्वः तयातःगु दु ।