खाद्यान्नय् परनिर्भरता अप्वल
येँ – नेपालं वंगु दँय् जक १९ अर्ब तकाया खाद्यान्न आयात याःगु दु । नेपाःयात कृषि प्रधान देय् धकाः धायेगु यानाच्वंसां नं कृषिइ परनिर्भरता अप्वया वनाच्वंगु खँ धाःगु दु । सम्बन्धित विज्ञतय्सं नेपाःया कृषि उत्पादन म्हो जुयाच्वंगु खँ धाःगु दु । नेपाःयात दँय् ६० लाख मेट्रिक टन वा माःसा थौंकन्हय् ५० मेट्रिक टनया हाराहारी जक उत्पादन जुयाच्वंगु दु । वंगु दँय ४२ लाख मेट्रिक टन जक वा उत्पादन जूगु खः ।
नेपाःमितय् जा नयेगु बानी जूगुलिं जाकिया आयात अप्वया वनाच्वंगु खः । नेपालय् लछिया १ अर्ब तका स्वयां अप्वः जाकि आयात जुयाच्वंगु दु । अथेहे वा धुंकाः छ्वया खपत जुयाच्वंगु दु । छ्वया उत्पादन १० लाख मेट्रिक टन जुयाच्वंगु दु । वंगु आर्थिक दँ २०७२÷७३ य् छ्व उत्पादन १८ लाख १२ हजार मेट्रिक टन जुयाच्वंगु खःसा थौंकन्हय् उत्पादन म्हो जुयाच्वंगु दु ।
उकथं हे करीब २३ लाख मेट्रिक टन कःनि उत्पादन दुयाच्वंगु दु । नेपालय् कःनिया माग ३० निसें ३५ लाख मेट्रिक टन जुयाच्वंगु दु । थौंकन्हय् नेपालय् स्थानीय जातिया कःनि उत्पादन तसकं म्हो जक जुयाच्वंगु दुसा विकासे कःनिया उत्पादन जुयाच्वंगु दु । उगु कःनि सा, म्ये व खाया दाना दयेकेगुलिइ अप्वः खपत जुयाच्वंगु दु ।
न्हापा न्हापा कःनिचुं नयेगु नेपाःमिया बानीइ आः हिउपाः वःगु दु । मुक्कं उत्पादन जूगु कःनिया ९० प्रतिशत दाना दयेकेत छ्यलेगु यानाच्वंगु दु । वा, कःनि व छ्व नेपाःया प्रमुख खाद्यान्न बाली खः । उकिया लिसें दुसि, तछ्व व फापर नं खाद्यान्न बालीइ लाः । दुसिया उत्पादन नं दँय्दसं म्हो जुया वनाच्वंगु दु ।
दुसिया उत्पादन ३ लाख २४ हजार मेट्रिक टन जुयाच्वंगु दु । सरकारं वंगु बजेटपाखें वइगु न्यादँया दुने कृषिइ परनिर्भरता चीकेगु निंतिं उत्पादन दोब्बर यायेगु आज्जु तयातःगु दु । प्रधानमन्त्री कृषि आधुनिकीकरण परियोजनापाखें पकेट, ब्लक, जोन व सुपरजोनपाखें कृषि क्षेत्रया पहिचान यानाः उत्पादन अप्वयेगु नीति सरकारं काःगु दु ।
LEAVE YOUR COMMENTS