ट्रम्पया विदेश नीतिइ अप्वः अमेरिकीत विपक्षय्

अमेरिकी राष्ट्रपति डोनाल्ड ट्रम्पया विदेश नीतियात कयाः अप्वः धयाथें अमेरिकी जनता विपक्षय् दुगु खँ छगू जनमत सर्वेक्षणं खनेदुगु दु । सर्वेक्षणय् सहभागी जूपिं बछि स्वयां अप्वः अमेरिकीतय्सं मेगु दँय् अमेरिका विश्वव्यापाी उपस्थितिइ अझ कमजोर जुइगु खँ धाःगु दु ।

अमेरिकी समाचार संस्था एसोसिएटेड प्रेस (एपी) व एनेआआरसीं मंकाः रुपं याःगु जनमत सर्वेक्षणय् सिरिया व सम्भवतः अफगानिस्तान पाखें अमेरिकी सेना चिइकेगु राष्ट्रपति ट्रम्पया योजनाया बारे धाःसा अमेरिकी समाज विभाजित खनेदुगु खः ।समग्रय् सर्वेक्षणय् सहभागीतय्सं राष्ट्रपति ट्रम्पया विदेशी नीति संचालनय् परिपक्वता मक्यंगु धासें तसकं म्हो जक ल्याः बिउगु खः ।

सहभागी मध्ये ३५ प्रतिशतं जक राष्ट्रपतिया नीतियात समर्थन याःगु खःसा ६३ प्रतिशतं अस्वीकृत याःगु खः ।‘रसिया जुइमा वा उत्तर कोरिया, निगुलिं देय् लिसे स्वापू सुधार जुइगु सम्भावना तसकं म्हो जक दु’ कोलम्बियाया ३० दँया शिक्षिका सामन्था फ्लावर्सं धाःगु दु । ‘लिसें जःलाखःला देय् विशेष यानाः मेक्सिको लिसेया स्वापुतिइ हे छक्वः बिचाः याये, ट्रम्पं समर्थन याःसां उपिं अमेरिकी मूल्यमान्यता अःखः न्ह्याः वनाच्वंगु दु’ वं धाल ।

विदेशी भूमि जारी युद्धय् अमेरिकी सेनाया उपस्थिति व सहभागीता बारे मिश्रित प्रतिक्रिया वःगु दु । थ्यंमथ्यं ३९ प्रतिशत अमेरिकीतय्सं सिरियाय् तैनाथ करिब निद्वःम्ह अमेरिकी सेना लित हयेगु ठीक जूगु धालसा ३५ प्रतिशतं थ्व पलाः सही मजूगु खँ धाल ।

‘जिगु बिचारय् इराक, अफगानिस्तान व सिरियां आः अमेरिकी सेना छेँय् लिहां वयेगु उपयुक्त ई वःगु दु’ छम्ह ट्रक ड्राइभर क्लिभल्यान्डं धाल, ‘जि भियतनामय् दुबलय् नं जिं यक्व हे असल पासापिं मदयेकाच्वने माल । जिगु बिचारय् थ्व नं मूर्खतापूर्ण युद्ध जूगु खः ।’
अफगानिस्तानं अमेरिकी सेना लित हयेमाःगु विषयय् नं मतान्तर खनेदु ।

करिब ४१ प्रतिशत अमेरिकीतय्सं अफगानं अमेरिकी सेना लित हयेमाः धाःगु दुसा ३० प्रतिशतं अस्वीकार याःगु दु ।‘अमेरिकी सैनिक विश्वया हे प्रहरी जुइगु ठीक मखु’ टेनेसीया ब्रिस्टोलय् च्वंम्ह ४४ दँया रोबर्ट ग्रान्गरं धाल, ‘झीसं अमेरिकी सेनां फुक्क देशं लित हयेमाः ।’करिब ४१ प्रतिशत डेमोक््रयाट्सत विश्वन्यंकं अमेरिकी भूमिका अप्वयेकेमाःगु पक्षय् दुसा २३ प्रतिशतं अमेरिकी भूमिका सामान्य सक्रियता जक क्यनेमाःगु खँ धाःगु दु ।

अथेहे ३२ प्रतिशत डेमोक््रयाटसतय्सं देय्या आःया भूमिका ठीक मजूगु खँ धाःगु दु । रिपब्लिकन पार्टीलिसे आवद्धपिनिगु दृष्टिकोण धाःसा फरक दु । झिम्ह मध्ये प्यम्ह रिपब्लिकनतय् धापु कथं विश्वया समस्याया समाधानय् अमेरिकाया भूमिका म्हो जक जुइमाः, जबकी ४६ प्रतिशतं विश्व मामिलाय् आःया अमेरिकी भूमिका ठीक दु धाःगु दु । करिब १३ प्रतिशत रिपब्लिकनतय्सं धाःया विश्वय् अमेरिकी भूमिका अझ सक्रिय जुइमाः धाःगु दु ।