भारतं पाकिस्तानी उच्च आयोगया कर्मचारी पितिनीगु

एजेन्सी – भारतं न्हूदिल्ली च्वंगु पाकिस्तानी उच्च आयोगय् ज्या यानाच्वंपिं बछिं मल्याक कर्मचारीतय्त थःगु देशं निष्काशन यायेत्यंगु दु। थुपिं कर्मचारीतय्सं गुप्तचरी याःगु व आतंकवादीतलिसे स्वापू दुगु धासें पितिने त्यंगु खः ।

भारतीय विदेश मन्त्रालयं पाकिस्तानय् च्वंगु भारतीय उच्च आयोगय् नं उलि हे ल्याखय् कर्मचारी कटौती यायेगु खँ धाःगु दु । भारतं स्ववाः न्ह्यव पाकिस्तानी कुटनीतिज्ञयात देश निकाला यायेधुंकूगु निगू आणविक शक्ति देय् दथुइ तनाव तच्वया वःगु खः । भारतं थुमित सेनाया वये-वनेगु सम्बन्धी सुचं मुंकेगु कुतः याःगु द्वपं बिउगु खः ।

भारतीय सञ्चार माध्यमतय्सं इस्लामावादय् च्वंपिं निम्ह भारतीय कर्मचारीतय्त दुव्र्यवहार याःगुलिं थ्व पलाः ल्ह्वंगु अनुमान याःगु दु। वंगु वालय् भारतीय सरकारं थः निम्ह कर्मचारीतय्त पाकिस्तानं अपरहण याःगु द्वपं बिउगु खः । तर पाकिस्तानं धाःसा उमिसं चले यानावःगु गाडीं लँजुवाःतय्त ठक्कर नकूगुलिं ज्वनागु खँ धाःगु दु ।

द हिन्दूस्तान टाइम्सया कथं निगुलिं देय्या उच्च आयोगय् ११० म्ह कर्मचारीतय् दरबन्दी दुगु खःसा आः ९० म्ह कर्मचारीतय्सं जक ज्या यानाच्वंगु दु। भारतया निर्णय लिपा आः निगुलिं देशं ३५-३५ म्ह कर्मचारी वइगु छवाः दुने थःथःगु देशय् लिहां वनेमाःगु जुइ ।