सउदीयात ग्वाहालि दिकेगु खँय् अमेरिकी सिनेटय् मतदान

येँ – साउदी अरेबियां यमनया हुथी विद्रोहीत विरुद्ध न्ह्याकाच्वंगु आक्रमणय् अमेरिकां बिया वयाच्वंगु सैनिक ग्वाहालि दिकेगु कि न्ह्याका हे तयेगु धयागु बारे सहलह खुल्ला यायेगु धयागु प्रस्तावयात अमेरिकी सिनेटया बहुमतं पारित याःगु दु । साउदी पत्रकार जमाल खशोग्जीया हत्याया विषययात कयाः ट्रम्प प्रशासन व कंग्रेस दथुइ जुयाच्वंगु तनावया दथुइ थ्व लिच्वः पिहां वःगु दु ।

सिनेटय् उगु विवादयात कयाः छलफल न्ह्याकेमाः धयागु प्रस्तावया पक्षय् ६० व विपक्षय् ३९ मत लाःगु खः । थ्व प्रस्ताव रिपब्लिकनया हे सिनेटर माइक ली व स्वतन्त्र सिनेटर बर्नी स्यान्डर्सं न्ह्यब्वःगु खः । पत्रकार खशोग्जीया हत्याय् साउदी राजकुमारया प्रत्यक्ष ल्हाः दुगु थीथी अनुसन्धानं खने दयाच्वंगु दु ।

तर अमेरिकी राष्ट्रपति डोनाल्ड ट्रम्प धाःसा साउदीयात अमेरिकाया असल मित्र जूगुलिं राजकुमारयात द्वपं बिइमजिउगु तर्क तया वयाच्वंगु दु ।अमेरिकी विदेशमन्त्री माइक पोम्पाओ व रक्षामन्त्री जेम्स म्याटिसं सिनेट बैठकय् खशोग्जीया हत्या व यमनय् जुयाच्वंगु द्वन्द्वयात कयाः जानकारी बियादीगु खः ।