फागुनय् नीद्वः कर्मचारी माग जुइगु

येँ – संघीय मामिला तथा सामान्य प्रशासनमन्त्री लालबाबु पण्डितं वइगु फागुन दुने थ्यंमथ्यं २० हजार निजामति कर्मचारी माग यायेगु खँ धयादीगु दु । नेपाल यातायात महिला चालक समूहं शनिवाः ग्वसाः ग्वःगु छगू ज्याझ्वलय् न्ववानादिसें मन्त्री पण्डितं संघीय लोकतान्त्रिक प्रणालीयात व्यवस्थित यायेत आःया निंतिं नीद्वःया ल्याखय् कर्मचारी आवश्यक जूगु खँ धयादीगु खः ।

लिसें वय्कलं माघ महिना दुने के कर्मचारी समायोजनया ज्या क्वचायेकेगु खँ नं धयादीगु दु ।समूहपाखें बिउगु शीपमुलक तालिमया प्रमाणपत्र लःलहानादिसें वय्कलं देशय् पूर्वाधार विकास व उत्पादन क्षेत्रय् लगानी यानाः तःधंगु ल्याखय् रोजगार सिर्जना यायेफइगु खँ नं धयादिल ।

अथेहे पर्यटन विभागया महानिदेृशक डुन्डुराज घिमिरें व्यवसायीक सीपया माध्यम दक्ष जनशक्ति उत्पादन यानाः मिस्तय् आर्थिक रुपान्तरणया भूमिका म्हिताच्वंगु संस्थायात फुगु ग्वाहालि यायेगु प्रतिबद्धता प्वंकादीगु खः ।

अथेहे ग्रीनसिटी अस्पतालया अध्यक्ष लोकबहादुर टण्डनं समाजय् ल्यनाच्वंगु गरिबी पछौटेपनया अन्त्य यायेत उद्यमशीलताया आवश्यक दुगु धासें मिस्तय् आर्थिक पहुँच मदुगु कारणं समाजय् हिंसा व विभेद अप्वयाच्वंगु बिचाः प्वंकादिल ।राष्ट्रिय समाचार समितिया पत्रकार व उगु संस्थाया सल्लाहकार कृष्णराज गौतमं देशय् अप्वया च्वंगु व्यापार घाटा न्यूनिकरण यायेत घरेलु उद्योग व स्वदेशी उत्पादनयात प्रश्रय बीमाः धयादिल ।

ज्याझ्वलय् समूहया अध्यक्ष मिनाचन्द ठकुरीं वंगु खुदँ न्ह्यव नीस्वनागु संस्थां ब्युटिपार्लर, फेसन डिजाइन, सिलाइबुनाइ, सवारी चालक लगायतया विधाय् सीप स्यना वयाच्वनागु खँ कनादिल ।