होटल व्यवसायीपाखें आन्दोलनय् वनेगु ख्याच्वः

येँ (नेपालभाषा टाइम्स) – होटल व्यवसायी महासंघं थःपिनिगु माग पूमवन धाःसा आन्दोलन यायेगु ख्याच्वः बिउगु दु। महासंघं झिंप्यंगू बुँदाया माग न्ह्यब्वसें तत्काल सम्बोधन मजुल धाःसा आन्दोलन यायेगु ख्याच्वः बिउगु खः ।

कोरोना भाइरसया कारणं फुक्कं होटल बन्द जूगु तर सरकारं चीधंगु होटलयात बेवास्ता याःगु धासें साना होटल व्यवसायी संगठनं थीथी झिंप्यंगू बुँदाया माग तत्काल पूवंकेत सरकारयात इनाप याःगु दु। म्हिगः छगू पत्रकार सम्मेलन यासे ं महासंघया अध्यक्ष हिराध्वज शाहं माग सम्बोधन मजुल धाःसा आन्दोलन यायेगु ख्याच्वः बिउगु खः ।

वय्कलं विषम परिस्थितिइ सरकारं तःधंगु तारे होटल व चीधंगु होटल दथुइ विभेद याःगु द्वपं बिसें थःपिंसं विदेशं वइपिं नेपाःमियात झिंप्यन्हु तक निःशुल्क होटल तयेत तयार जुयां नं सरकारं थिकेगु होटलय् तःगु द्वपं नं बियादीगु दु। वय्कलं धयायदिल, ‘विदेशं वइपिं नेपाःमिया इच्छा कथं दंगु भावय् थःपिनिगु होटलय् व्यवस्थापन यायेत माग यानागु खः । तर सरकारं उकियात वेवास्ता यानाः थिकेगु होटलय् तयेगु यात ।’

महासंघं छेँ बहालय् ५० प्रतिशत छुटया व्यवस्था यायेमाःगु, छेँथुवालं बैकय् कयातःगु त्यासाया ब्याजय् छुट बीमाःगु माग नं याःगु दु। उकथं हे लकडाउन चालेधुंकाः होटल सञ्चालन जुइत समस्या जुइगुलिं मत व लःया महसुल दछिया निंतिं छुट बीमाःगु, टेलिफोन, इन्टरनेट सेवाय् विशेष सहुलियत बीमाःगु, दछिया व्यवसाय कर व राजस्वय् छुट बीमाःगु, बैंकया त्यासा व ब्याज भुक्तानी निदँ ई तनेमाःगु आदि माग यानातःगु दु ।