हडतालं यानाः चिया श्रमिकतय् बिजोग

येँ – थ्यंमथ्यं लत्या न्ह्यव निसें पूर्वी नेपालया चिया बगान व उद्योग बन्द यानाः हडताल यानाच्वंपिं चिया मजदूरत थौंकन्हय् बिचल्ली लानाच्वंगु दु । आन्दोलनरत मजदूरतय्त वंगु ४३ न्हु न्ह्यवनिसें व्यवस्थापनं ध्यबा मबिउगुलिं उपिं नयेत्वने तकं मखंका च्वनेमाःगु अवस्था वयाच्वंगु दु । उमिसं सामान्य विरामी जूसां तक नं वासः न्यायेगु अवस्था मदयाच्वंगु खँ धाःगु दु ।

मजदूरतय्सं वंगु चैत १७ गते निसें नेपाः सरकारं तोके यानातःगु दैनिक ज्याला दयेमाःगु माग यासें आन्दोलनय् कुहां वंगु खः । उमिगु माग दैनिक ज्याला ३८५ तका दयेमाःगु खः । उमिसं थ्व माग तयाः चिया बगान व उद्योग बन्द याःगु ४३ न्हु दयेधुंकाः नं मागयात कयाः सम्बोधन मजूबलय् आन्दोलनरत मजदूरत विचल्लिइ लानाच्वंगु दु ।

चियाबगानया मजदूतय्सं बगान व उद्योग बन्द जुसां निसें बांलाक जा तकं नयेमखंगु खँ धाःगु दु । अनया छम्ह मजदूर सम्झना उराऊं बिबिसीलिसे खँ ल्हासें जंगलय् मालाहयेगु कण्डमुल मनाः नयेमालाच्वंगु खँ धाःगु दु । ‘जा नयेमखंगु हे थ्यंमथ्यं लछि दयेधुंकल, थिंका जक गुलि नयेगु, लिपा मपुसें मगाः । कमाइ मदु, गनं ध्यबा हयाः पुलेगु’ वं धाःगु दु ।

वंगु ४३ न्हु न्ह्यवनिसें व्यवस्थापनं ध्यबा
मबिउगुलिं उपिं नयेत्वने तकं मखंका च्वनेमाःगु अवस्था वयाच्वंगु दु

स्ववाः स्वयां न्ह्यवनिसें ध्यबा कायेमखंपिं मजदूरतय्सं थः मस्तय्त आखः ब्वंके छ्वयेत नं समस्या फयेमा लाच्वंगु दु । सम्झना उराऊं थिंका हे कापीकलम न्यानाः स्कुल छ्वयेमालाच्वंगु खँ कंगु दु । किताब न्यायेत नं ध्यबा मदुगु खँ कँसें वं धाःगु दु, ‘छम्ह म्ह्याय्या किताब न्यायेत जक हे स्वद्वः ध्यबां मगाः, तर पसलें थिंकाः मबिल धाःसा खालि ल्हाः लिहांवयेमाली ।’

चिया बगान न्हापा नं हडताल जू, तर आः थेंज्याःगु अवस्था न्हापा गुबलें मजूगु खँ मजदूरतय्सं धाःगु दु । मचां निसें चिया बगानय् म्हिता वयाच्वंम्ह मेम्ह मजदूर अञ्जली बनियां धाःगु दु, ‘थज्याःगु अवस्था ला न्हापा गुबलें फयेमलंनि ।’ वं धाल, ‘न्हापा न्हापा नं हडताल जू, तर छुं न्हि दुने हे सहमति जुइ । थ्व पालय् थें थथे नये हे मखंक च्वनेमाःगु अवस्था न्हापा गुबलें मजू ।’

चिया मजदूरयात थ्व हालतय् हयेगुली मू जिम्मेवार सरकार व उद्यमीत हे जूगु मजदूरतय् दावी दु । बुधकरण चिया बगानय् ज्या यानाच्वंम्ह छम्ह मजदूर राजकुमार तामांगं नियम दयेकीम्ह सरकार व कार्यान्वयन मयाइम्ह उद्योगीया कारणं हे थज्याःगु अवस्था वःगु खः ।

वय्कलं धाःगु दु, ‘मजदूरतय्सं कानुनं बिउगु हक जक फ्वंगु खः, उकियात सरकारं छाय् कार्यान्वयन याके मफुत ?’ मेम्ह मजदूर कंग्रेस बनियां न्ह्याथे यानाःसां थःपिंसं कायेदयेमाःगु अप्वःगु ज्याला साउन महिनां निसें वयेमाः धाःगु दु । सरकारं चिया मजदूरतय् निंतिं दैनिक ज्याला ३८५ तका व थप ईया निंतिं प्रतिघण्टा ५१ तका तोके यानातःगु दु । तर श्रमिकतय्सं धाःसा न्हि २७८ तका जक कायेखनाच्वंगु दु ।

सम्बन्धित बुखँ

LEAVE YOUR COMMENTS