आर्थिक वृद्धिदर ७.२ कायम याना तयेत ३० हजार मेगावाट मत आवश्यक
येँ – नेपाःया आर्थिक वृद्धिदर ७ दशमलव २ प्रतिशत कायम यायेगु खःसा सन् २०४० तक ३० हजार मेगावाट मत उत्पादन यायेमाःगु खँ धाःगु दु ।
नेपाल विद्युत प्राधिकरणं देय्या आर्थिक वृद्धिदरयात आधार दयेकाः तयार याःगु छगू रणनीतिक कार्ययोजनाय् नीनिदँ लिपा मत उत्पादन क्षमता २९ हजार ४२७ मेगावाट जुइमाःगु खँ न्ह्यथनातःगु दु । सामान्य रुपय् ४ दशमलव ५ प्रतिशतया दरं जक आर्थिक वृद्धि जूगु अवस्थाय् धाःसा सन् २०४० तक १९ हजार १५१ मेगावाट मत आवश्यक जुइगु प्राधिकरणं प्रक्षेपण याःगु दु । सरकारं चालू आर्थिक दँया वृद्धिदर ७ दशमलव २ प्रतिशत जुइगु प्रक्षेपण याःगु सन्दर्भय् उगु हे दरयात आधार दयेकाः मतया माग व आपूर्तिया तकं प्रक्षेपण याःगु खः ।
प्राधिकरणया कथं सन् २०२० अथे धयागु वइगु निदँया दुने ७.२ प्रतिशतया दरय् आर्थिक वृद्धि जुल धाःसा ३ हजार ६११ मेगावाट मत मालीगु खनेदु । प्राधिकरणं ९ दशमलव २ प्रतिशतया दरं आर्थिक वृद्धि जुइगु अवस्थाय् धाःसा सन् २०४० तकया दुने ४२ हजार २२८ मेगावाट मालीगु खँ धाःगु दु ।
नीतिगत व कानुनी सुधार यात धाःसा उगु ईया दुने ५१ हजार ३३० मेगावाट मत उत्पादन यायेफइगु प्राधिकरणया धापू दु । आर्थिक दँ २०७३÷०७४ य् देय्या आर्थिक वृद्धि ६ दशमलव ९ प्रतिशत जूगु व चालू आवय् ७ दशमलव २ प्रतिशत जुइगु प्रक्षेपण याःगु सन्दर्भय् प्राधिकरणं उगु हे आधारय् मतया क्षमताया बारेय् प्रक्षेपण याःगु खः । नेपाःया प्रतिव्यक्ति मत खपत दर दक्षिण एशियाय् हे म्हो जूगु सन्दर्भय् मत खपत अप्वयेकेत नं नीतिगत सुधार, औद्योगिक विकासय् बः बीमाःगु विज्ञतय् धापू दु ।
देशय् हे न्ह्यथनेबहःगु मात्राय् मत आपूर्ति जुइगु खःसा तत्काल ५ हजार मेगावाट बराबर मत खपत याये फइगु प्राधिकरणाया धापू दु । विद्युतीय सामग्रीया अत्यधिक छ्यला व पेट्रोलियम पदार्थया आयात प्रतिस्थापन यायेगु खःसा जक तत्काल ५ हजार मेगावाट मत खपत जुइफुगु खँ प्राधिकरणया कार्यकारी निर्देशक कुलमान घिसिङं कनादीगु दु । आर्थिक वृद्धिया महत्वपूर्ण आधारया रुपय् दुगु जलविद्युतया विकासयात मू प्राथमिकताय् तये फतधाःसा आर्थिक वृद्धिदर थहां वनीगु धासें उद्योगी व व्यवसायीं नं सरकारयात आग्रह यानाच्वंगु दु । नेपाल उद्योग वाणिज्य महासंघं शनिवाः प्रधानमन्त्री केपी ओलीलिसे नापलायेगु झ्वलय् वंगु दँ निसें लोडसेडिङ मजूगुलिं औद्योगिक क्षेत्रय् सुधार वःगु व थुकियात थप सहजीकरण यायेमाःगु खँ धाःगु खः । औद्योगिक क्षेत्रय् छगू युनिट मत बराबर झिदुगं प्रतिफल वइगु महासंघया धापू दु ।
आव २०७३÷०७४ या तुलनाय् औद्योगिक क्षमताया ९ दशमलव १ प्रतिशतं वृद्धि जुइगुया लिउने मतया सहज उपलब्धता हे जूगु महासंघया अध्यक्ष भवानी राणाया धापू दु । मानव विकास सुचकांकय् नं मतया भुमिका महत्वपूर्ण जुइगु यानाच्वंगु दु । प्रतिव्यक्ति मत खपतया दरया आधारय् नं लिपांगु न्हिं मानव विकासया सूचकांक निर्धारण यायेगु यानाच्वंगु दु । सार्क क्षेत्रय् औसतय् ७७१ किलोवाट घण्टा प्रतिव्यक्ति मत खपत दर दु । अफगानिस्तानया प्रतिव्यक्ति मत खपत दर १०१ किलोवाट घण्टा दु । नेपाःया धाःसा १६० किलोवाट घण्टा जक दु । चीनया प्रतिव्यक्ति मत खपत दर ३ हजार ४९३ किलोवाट घण्टा दुसा भारतया ९१७ किलोवाट, भुटानय् १ हजार ६१९, श्रीलंकाय् ४९० व माल्दिभ्सय् ७५२ किलोवाट घण्टा दु । दक्षिण कोरियाय् १२ हजार ९०० व नर्वेय् २३ हजार १७४ किलोवाट घण्टा दु । आर्थिक वृद्धिदर व मानव विकास सूचकांकय् तकं ऊर्जाया खपतं योगदान याइगु जूगुलिं उकियात विशेष ध्यान बीमाःगु राष्ट्रिय योजना आयोगया पुलांम्ह दुजः डा. अरविन्दकुमार मिश्रया धापू दु ।
LEAVE YOUR COMMENTS