अमेरिकी राष्ट्रपतिं आपतकाल लागू मयाइगु

अमेरिकी राष्ट्रपति डोनाल्ड ट्रम्पं अमेरिकाया संघीय कार्यालय आंशिक रुपं बन्द जुयाच्वंगु अवस्थाय् थुकियात चायेकेत आपतकालीन स्थिति घोषणा मयायेगु खँ धयादीगु दु । बजेट अभावया कारणं अमेरिकाया संघीय ज्याकूत बन्द जूगु २३ न्हु दयेधुंकूगु दु । राष्ट्रपति ट्रम्पं मेक्सिकोलिसेया सीमाय् पःखाः ग्वयेगु निंतिं माग याःगु थ्यंमथ्यं खुगू अर्ब अमेरिकी डलर बजेट संसदं पारित मयात धाःसा थःम्हं नं बजेट हे स्वीकृत मयायेगु अडान कया वयाच्वंगु दु ।

अमेरिकाया क्वय्या सदनया बहुमतं दुगु विपक्षी डेमोक्र्याट पार्टीं धाःसा पःखाः ग्वयेगु निंतिं राष्ट्रपतिं माग याःकथं छुं नं हालतं ध्यबा बीफइमखु धाःगु दु । उमिसं पःखाः ग्वयेगु ज्या अनुत्पादक व खर्चिलो धकाः धासें मेक्सिकोया सीमापाखें अमेरिका दुहां वइपिं आप्रवासीपाखें अमेरिकाया आन्तरिक सुरक्षाय् छुं खतरा मदुगु दावी नं याःगु दु ।

राष्ट्रपति ट्रम्पं धाःसा मध्य अमेरिकी मुलुकं अमेरिका दुहां वइपिं आप्रवासीतय् कारणं अमेरिकाया आन्तरिक सुरक्षाय् तःधंगु खतरा वयाच्वंगु खँ धयाच्वंगु दु । वय्कलं मध्ये अमेरिकापाखें लागू वासः दुहां वयाच्वंगु, हत्या हिंसा अप्वःगु, सामाजिक विकृति व विसंगति अप्वःगु आरोप बिया वयाच्वंगु दु ।

आपतकालीन स्थित घोषणा यानाः बजेट पिकायेत छाय् लिबाका च्वनागु धकाः फक्स न्यूजं न्यंगु छगू न्ह्यसलय् राष्ट्रपति ट्रम्पं धयादीगु दु, ‘जि विपक्षी डेमोक्र्याटिक पार्टीया सांसदतय्त अझं छुं ई बिइ चाहे जुया । जिगु बिचारय् उमिसं अवश्य जिम्मेवारीपूर्वक निर्णय याइ जुइ ।’
अमेरिकाया संघीय ज्याकुत बजेट अभावं थपाय्हाकः बन्द ज ूगु थ्व हे न्हापांखुसी खः ।

अमेरिकी राष्ट्रपति बिल क्लिन्टनया कार्याकालय् सन् १९९५–९६य् नं २१ न्हु तक संघीय ज्याकू बन्द जूगु खः । राष्ट्रपति ट्रम्पं थःगु प्रस्ताव ठीक जू धासें शनिवाः तःक्वः हे ट्विट नं याःगु खः । दक्षिण सीमाय् जारी तःधंगु मानवीय संकट अन्त्य यायेत बजेट आवश्यक दुगु वय्कःया धापू दु ।

सम्बन्धित बुखँ

LEAVE YOUR COMMENTS