दकलय् थिकेगु अंगुर

अंगुर सकसिनं भपियादीगु दयेमाः । छगू किलो अंगूरया सछिनिसें सत्या तका थ्यं । तर छझ्वाः अंगुरया हे १२ गू लाख तू धायेबलय् सु पत्याः जुइथें ? तर पत्याः मयानां छु याये ? जापानीजतय्सं किलोया मखु छझ्वाःया हे १२ गू लाख पुलाः अंगुर न्यानाच्वंगु दु । थ्व अंगुर मेमेगु अंगुर थें धाःसा मखु । थ्व विशेषकथंया अंगुर खः ।

रुबी रोमन जातिया थ्व अंगुरया ग्वः मेमेगु अंगुरया ग्वः स्वयां तग्वः जुइ । थ्व अंगुरया छगः हे २० ग्रामया दइ । छझ्वालय् नं २४ गः हे जक दइगु थ्व अंगुरया मेगु नं विशेषता दु । थ्व अंगुर झीसं नया वयाच्वनागु थें वाउँसे वा हाकुसे च्वनी मखु । थ्व पूर्ण रुपं हे ह्याउँसे च्वनी ।
जापानया इशिकावा प्रान्तया सरकारी निकायं थ्व जातया अंगुरया विकास यानाच्वंगु दु ।

नयेबलय् नं तसकं हे माकुसे च्वंगु थ्व ह्याउँसे च्वंगु अंगुर जापानय् ‘लक्जरी फल’या श्रेणीइ लाः । विशेष यानाः थ्व अंगुरया प्रयोग दकलय् अप्वः भिंगु व साइतया ज्याय् जुइ । तसकं थिकेगु जूगुलिं थ्व अंगुरयात ‘तःमिगु फल’या नामं नं म्हसीकेगु याः । हालसालय् जक थ्व अंगुरया छझ्वाः कानाजावा बजारय् लिलाम जूगु खःसा थ्व झ्वलय् छगू होटलया मालिकं ११ हजार अमेरिकी डलर पुलाः न्याना यंकूगु खः ।