क्यानाडाय् नेपाः म्हसीकीगु काराब्राम बहु सांस्कृतिक मेला

येँ(नेपालभाषा टाइम्स)÷ क्यानाडाया ब्राम्प्टन सहरय् नेपाली कला, संस्कृति, म्हसीका बीगु ल्याखं ‘काराबाम बहु सांस्कृतिक मेला–२०२३’ जुल । दँय्दसं जुया वयाच्वंगु थुगु मेला थुगुसी वंगु जुलाई ७ निसें ९ तक स्वन्हुयंकं जूगु खः ।

विश्वन्यंकं महामारीया रुपय् न्यना वंगु कोरोनाकाल बाहेकं दँय्दसं ग्वसाः ग्वया वयाच्वंगु थुगु मेलाय् नेपाःमि समुदायं नेपाःया मौलिकता पिज्वइकथंया सामाजिक, सांस्कृतिक, पहिचान, पहिरन, नसात्वँसा, संगीत आदिया परिचय बीत सफल जूगु खँ धाःगु दु ।

स्वन्हुयंकं जूगु मेलाया न्हापांगु दिं मेला आयोजक एनसीएनसी, निन्हुया दिं क्यानेडियन नेवाः गुथि व स्वन्हुया दिं एनजेएसीं संयोजन याःगु खः । मेलाय् नेपाःया हिमाल, पहाड, तराईया नृत्य, जातीय पहिरन, हिमालयन भाइब्सया लोक धुन, मञ्जुश्री, वज्रयोगिनीया चर्या प्याखं, जात्रा, पर्वया झलक पिज्वइकथं लाखे, कुमारि प्याखं, भजन, लोक प्याखं, लाखामरि, अँयथ्यालिसें इहिपा यायेत माःगु नेवाः मरिचरिलिसें थीथी परिकारया स्टल नं तःगु खः ।

नेपाः व क्यानाडाया राष्ट्रिय गानया धुन हायेकाः शुरु जूगु मेलाया उलेज्या क्यानाडाया निंतिं कार्यवाहक नेपाली राजदूत रोजिना ताम्राकारं त्वाःदेवाय् मत च्याकाः यानादीगु खः । ज्याझ्वलय् नवासें वय्कलं विदेशय् थुकथंया ज्याझ्वलं नेपाःया म्हसीका बीगु नापनापं पर्यटन उद्योगया विकासय् नं तिबः जुइगु विश्वास प्वंकादिल । लिसें वय्कलं थुकथंया ज्याझ्वलं देय्या आर्थिक विकासय् नं योगदान बी धासें विदेशय् च्वना वयाच्वंपिं नेपाःपिंसं थःगु मातृभूमिया प्रचार प्रसार यायेकथं ज्याझ्वः यानावयाच्वंगुयात कयाः नं च्वछायादीगु खः ।

क्यानेडेली संघीय सांसद सोनिया सिन्धुं सुन्दर नेपालमण्डपया निंतिं नेपाःमि समुदाययात भिंतुना बियादिसें थुकं क्यानाडाया बहुसांस्कृतिक स्वरुपयात अझ सशक्त यायेत ग्वाहालि जुइगु विश्वास प्वंकादिल ।

मेला आयोजक एनसीएनसीया अध्यक्ष नरबहादुर क्षेत्रीं नेपाली संस्कृतिया प्रचार प्रसार यायेत थुकथंया ज्याझ्वः यायेमाःगु नापं ज्याझ्वलय् सकसिगुं सहभागिता दयेमाःगु खँय् बः बियादिल । मेगु आयोजक संस्था क्यानेडियन नेवाः गुथिया नायः प्रकाश प्रधानं क्यानेडेली सरकारं हे ‘विविधताय् एकता’ धइगु नारायात कःघानाः सांस्कृति प्रवद्र्धनया निंतिं आवश्यक वातावरण ब्वलंका बिउगुलिं नं थःपिंसं थःगु भाषिक, सांस्कृतिक, सामाजिक, पहिचानया संरक्षण व संवद्र्धन यायेगु ह्वःताः चूलाःगु खँ कनादिल ।

ब्राम्प्टन नगरया मेयर प्याट्रिक ब्राउनं नेपालमण्डप पभेलियनया निरीक्षण लिपा विश्वया दकलय् तजाःगु च्वापुगुँ सगरमाथाया नामं ब्राम्प्टन नगरया छगू उद्यानयात ‘सगरमाथा पार्क’ तयेगु जानकारी बियादिल ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु