ने. सं. ११४४ ञलाथ्व नवमी -

न्हापांखुसी गंल्वचं कःपिनिगु सर्वेक्षण शुरु

थिमि – नेपालय् इतिहासय् न्हापांखुसी गंल्वचं कःपिनिगु सर्वेक्षण शुरु जूगु दु । राष्ट्रिय क्षेयरोग केन्द्र इतिहासय् न्हापांखुसी उकथं वृहत रुपं गल्वचं कःपिनिगु सर्वेक्षण शुरु याःगु खः । केन्द्रं राष्ट्रिय क्षयरोग प्रसार सर्वेक्षण अभियान न्ह्याकूगु खः । मध्यपुर थिमिया बालकोटं अभियानया शुरुवात याःगु खः । नेपालय् स्वँलाया गंल्वय्या ल्वगितय यकिन ल्याः गुलि दु धइगु बारे आतक छुं तथ्यांक मदु । उकिया यकिन तथ्यांक कायेगु ल्याखं सर्वेक्षण यानागु केन्द्रया निर्देशक डा. केदारनर्सिह केसीं कनादीगु दु ।

देय्न्यंकंया हिमाल, पहाड व तराईयात कःघायेकथं न्यय्न्यागू जिल्लाया ९९ गू क्लस्टर छुटे यानाः सर्वेक्षण शुरु यानागु वय्कलं धयादिल । थ्व अभियानया झ्वलय् ५७,६१० यात प्रत्यक्ष रुपं त्वाः त्वालय् हे वनाः अत्याधुनिक डिजिटल प्रविधिपाखें ल्वय् लंकेगु परीक्षणया माध्यमं गल्वचं पिनिगु वास्तविक अवस्थायात अनुमान याये फइगु वय्कःया धापू दु ।

नेपाल सरकारं २३, ग्लोबल फन्डपाखें १७ व नर्वेया लङ हेल्थ फाउन्डेसनपा स्वंगू करोड यानाः मुक्कं ४३ करोडया लागतय् शुरु याःगु सर्वेक्षणय् जापानया आइटिएं प्राविधिक ग्वाहालि याइगु जूगु दु । औपचारिक रुपं ख्वपं शुरु जूगु थ्व सर्वेक्षण प्यन्हुतक ख्वपय् न्ह्याइ । पाइलटिङया रुपय् ख्वप, सिन्धुली व दोलखाय् सर्वेक्षण यायेगु योजना दयेकातःगु दु । थ्व झ्वलय् वइगु माघ २४ गतेनिसें सिन्धुली व दोलखाय् नं सर्वेक्षण शुरु याइगु जुयाच्वंगु दु ।