लुम्बिनीइ स्वन्हुयंकं त्रिपिटक पाठ याइगु

येँ (नेपालभाषा टाइम्स)- बुद्ध धर्मया दकलय् प्रमुख ग्रन्थ त्रिपिटकया म्हसीका बीगु ताः तयाः थ्वहे फागुन २० निसें २२ गते तक स्वन्हुयंकं लुम्बिनीइ त्रिपिटक पाठ याइगु जूगु दु । भिक्षु शोभन महास्थविरया अध्यक्षताय् नीस्वनातःगु स्वक्वःगु लुम्बिनी अन्तर्राष्ट्रिय त्रिपिटक पाठ समारोहया ग्वसालय् थ्व ज्याझ्वः जुइत्यंगु खः ।

थुकी स्वन्हुयंकं सुथंनिसें सनिलय् तक त्रिपिटकया स्वंगुलिं ग्रन्थया मू ब्व पाठ जुइगु खँ ग्वसाः खलःया सचिव भिक्षु निग्रोध महास्थविरं कनाबिज्याःगु दु । थ्व स्वयां न्ह्यः लुम्बिनीइ हे निक्वः तक थज्याःगु पाठ जुइधुंकूगु दु । भिक्षु निग्रोधं ‘नेपालभाषा टाइम्स’ यात कनाबिज्याःकथं भारतया बुद्धगयाय् नं त्रिपिटक पाठ यायेगु ज्या जुयाच्वंगु दु ।

अन दँय् छक्वः झिन्हु तक पाठ याःबलय् १७ दँया दुने सुत्तपिटक पाठ याये क्वचाःगु खः । थौंकन्हय् विनयपिटक पाठ जुयाच्वंगु दु । थ्व पाठ करिब २५ दँ न्ह्याइगु अनुमान दु ।
भारतय् उकथं पाठ जुयाच्वंगुलिं नेपाःया लुम्बिनीइ नं दँय्दसं त्रिपिटक पाठ यायेगु ज्या न्ह्याकूगु खःसां सन् २०१९ य् कोरोनाया कारणं थ्व ज्या दिनाच्वंगु खः ।

थ्व ज्याझ्वःपाखें बुद्धया मूल धर्म संग्रह जुयाच्वंगु त्रिपिटकबारे सर्वसाधारणं नं सीके खनीगु व त्रिपिटक प्रति नं सम्मान प्रकट जुइगु खँ वसपोलं कनाबिज्यात । ‘बुद्धशासनय् भिक्षु संघं मयासें मगाःगु थीथी ज्या मध्ये छगू त्रिपिटकया नियमित पाठ नं खः’ वसपोलं कनाबिज्यात ।

त्रिपिटक पाठया छन्हु न्ह्यः लुम्बिनीइ दयेकूगु थेरवाद विहारया संघावास नं संघनायक भिक्षु बोधिसेन महास्थविर लिसें थीथी हनेबहःपिंपाखें उलेज्या याइगु ज्याझ्वः दु ।