ने. सं. ११४४ ञलाथ्व दशमी -

चिनीया भंसार महसुल वृद्धि पुनःविचार यायेत इनाप

येँ – राष्ट्रिय उपभोक्ता मंचं चिनीया भंसार महसुल वृद्धि यायेगु नेपाल सरकारया निर्णय पुनःविचार यायेत इनाप याःगु दु । मंचं छगू विज्ञप्ती जारी यानाः चिनी आयातय् भंसार महसुल शतप्रतिशत वृद्धि यानाः ३० प्रतिशत थ्यंकूगु खँय् थःपिनिगु गम्भिर ध्यानाकर्षण जूगु नं धाःगु दु ।

नेपाल सरकारं वंगु बैशाख ४ गते चिनी आयातय् भंसार महसुल वृद्धि यायेगु निर्णय याःगु खः । दैनिक उपभोग्य नापं अत्यावश्यकीय खाद्यवस्तुया रुपय् दुगु चिनी नेपालय् करिब २८० मेट्रिक टन खपत जुइगु यानाच्वंगु दु । उकीमध्ये नेपाःया थीथी १३ गू उद्योगं आवश्यकताया करिब ४० प्रतिशत जक आपूर्ति यायेगु यानाच्वंगु दुसा ल्यं दुगु ६० प्रतिशत विदेश आयात यायेमाःगु स्थिति दु ।

छुं छुं व्यापारीतय्सं भारतपाखें तःधंगु मात्राय् चोरी पैठारी यानाः नं चिनीया आपूर्ति याना वयाच्वंगु दु । नेपाःया जःलाखःला देय् भारत व पािकस्तान लगायत विश्व बजारय् हे चिनीया भाः कुहां वयेगु क्रमय् दु । प्रति क्विन्टल ३२ डलरं न्यायेदुगु चिनी नेपाःया बजारय् खुद्रा बजाः मू आः हे नं ९५ निसें १०० तकां मीगु यानाच्वंगु दु ।

अन्तर्राष्ट्रिय बजाः भाःयात आधार दयेकेगु खःसा नेपाःया बजारय् अप्वलय् ६५ निसें ७० तकां न्याये दयेमाःगु इलय् अनावश्यक रुपं सर्वसाधारणं ३० निसें ३५ तका दां अप्वः पुलाच्वनेमाःगु अवस्थाय् सरकारं लिपांगु इलय् याःगु भंसार महसुल वृद्धिया निर्णय पूर्णरुपं उपभोक्ता हितया अःखः जूगु मंच विज्ञप्तीइ धयातःगु दु ।

निदँ स्वदँ न्ह्यवंनिसें तु बालीया भुक्तानी हे मबीगु, इलय् तु न्याये प्रक्रिया मन्ह्याकेगु ज्या याना वयाच्वंपिं उद्योगीतय्सं चिनी आपूर्ति व्यवस्थापनय् कालोबाजरी यासें भावय् कार्टेलिङ याना वयाच्वंगु आपूर्ति मन्त्रालयया छगू अध्ययनं क्यंगु दु ।