जब लँय् चकलेट बाः वन
मोटर जुइगु लँय् ध्याचः, फोहर, धः, लः, च्व, खि, बाः वनाच्वनीगु झीगु निंतिं सामान्य हे खः । गबलें गबलें सतकय् मोबिल, चिकं, मचिकं आदि बाः वयाच्वने यः । तर सतकय् चकलेट बाः वयाच्वंगु धइगु गबलें न्यने मलंनि । यदि लँय् चकलेट व नं खुसि थें बाः वयाच्वन धाःसा ला तसकं अजू चायापुगु खँ जुइ । अज्याःगु इलय् छिं छु यानादी ? शायद अथे जुल धाःसा थःत यत्तले चकलेट नयेगु ह्वःताः सुनानं त्वःफिकी मखु जुइ !
वंगु छुं दिं न्ह्यः पोल्याण्डया छगू सहरय् अज्याःगु हे दृश्य खनेदत । सुथ न्हापां पोल्याण्डया छगू सहरय् चकलेट बाः वयाच्वंगु ।
चकलेटया चकलेट जक लोड याना हयाच्वंगु छगः कन्टेनर सतकय् ग्वतुल । कन्टेनर सतकय् ग्वतुलेवं उकी तयाः हःगु चकलेट दक्वं सतकय् कुतुं वल । सतक तसकं क्वानाच्वंगुलिं चकलेट नं नाया वन, अले दक्वं चकलेट बुलुहुं सतकय् खुसि थें बाः वन ।
उलिजक गन खः धकाः कन्टेनरय् प्याकिंग यानातःगु चकलेट जक मखसे तरल चकलेट नं टन का टन तया हःगु खः । थ्व घटना पोल्याण्डया वार्सा व पोजान धइगु सहरया दथुइ लाःगु राजमार्गय् जूगु खः । राजमार्गय् तीव्र गतिं वयाच्वंगु कन्टेनर आकाझाकां सतकया सिथय् च्वंगु बारय् ठक्कर नयेवं कन्टेनर अनियन्त्रित जुयाः पल्टे जूगु खः ।
कन्टेनर पल्टे जुयाः चालक गम्भिर रुपं घाःपाः जूगु खःसा सतक छगुलिं चकलेटया चकलेट बाः वंगुलिं छु ईतक उगु लागाया सतक हे अवरुद्ध नं जूगु खः । अझ न्ह्यइपुगु छता खँ सतकय् बाः वंगु चकलेट सिलेत कर्मचारीतय्त तसकं सास्ति जूगु जक मखसे तःधंगु परिमाणय् लःया आवश्यक जूगु खः । अझ गुलिं थासय् ला चकलेट धिचिनाच्वंगुलिं उकियात चिइकेत च्वापु धी चिइकेगु स्वयां नं थाकुगु अधिकारीतय् धापू दु ।
LEAVE YOUR COMMENTS