‘माधव नेपालं गर्दन ध्यंसां जातीय राज्य बीफइमखु धाःगु खः’

येँ – नेपाःया न्हूगु संविधान च्वयेगु निंतिं संविधान सभा गठन जुइधुंकूगु इलय् एमालेया तत्कालिन महासचिव माधव कुमार नेपालं थःगु गर्दन हे ध्यंसां जातीय राज्य बीफइमखु धकाः धयादीगु खँ धाःगु दु ।

महाकवि गिरिजाप्रसाद जोशीया ८३ दँ बुन्हिया लसताय् जूगु छगू ज्याझ्वलय् न्ववानादिसें प्रगतिशील साहित्यकार व तत्कालिन एमालेया नेता नारायण ढकालं थ्व खँ धयादीगु खः । ‘उबलय् ‘माधव नेपाल बिचार समूह’ धयागु छगू पुचः दु । जि नं वय्कःया हे पुचलय् दुम्ह खः ।

छन्हु जिं वय्कःयात धया– माधव नेपालया बिचार धाःगु छु, व स्पष्ट यायेमाल । जि छम्ह ब्रम्हूया मचा जूसां नेपाल मण्डल जुइमा वा नेवाः–ताम्सालिङ जुइमा वा नेवाः राज्य जुइमा, न्ह्यागुलिइ जूसां च्वनेत तयार धकाः धया । उबलय् वय्कलं धयादिल– जिगु गर्दन हे ध्यंसां नेवाः राज्य बीफइमखु ।’

नेता नेपालं थथे धायेधुंकाः थःम्हं अय्सा जि छिगु बैठकय् वयेफइमखु धयाथकागु व आःतक गुबलें नं मवनागु खँ साहित्यकार ढकालं कनादीगु खः ।