जाकि फछिइ छम्वः लबः नयेगु

जिमि मांया नां मानकुमारी मानन्धर अले बाःया नां मंगलदास मानन्धर खः । जिमि बाः व जिगु नां छगू हे । जिगु नामय् दास जक मदु । जि १९९६ साल जेठं किपूया कुतुसाः त्वालय् बूगु । जि मचाबलय् अप्वः हे म्हितेगु जक । लिक्कसं च्वंगु लाछि त्वालय् वनाः पासापिं नापं गुच्चा म्हितः वनेगु । भगवान द्यः दुथाय् च्याम्पति नं म्हिता ।

जिमिगु त्वालं १०–१५ मिनेट ति हिजाफलं कुहां वन कि मूल खुसि वइ । माक्वःचा क्वय् व मूल खुसिइ न्याः लाः वनेगु । खुुसिया लः तसकं यच्चुसे च्वं । पासापिं नाप व हे खुसिइ न्या व कंगलि लायेगु । कंगलि धइपिं झिपा ल्हाःतुति दुपिं, झट्ट स्वयेबलय् न्या थें च्वं ! कंगलित खुसि सिथय् प्वालय् प्वालय् सुलाच्वनी ।

न्या लायेगु जाः मदु, उकिं जिमिसं न्ह्याबलें ल्हातं हे कंगलि साला कायेगु, ल्हाःतुति त्वथुला बीगु । ल्हाःतुति त्वथुल कि कंगलि सने फइमखु । अले व दक्वं तपुलिइ मुना हयेगु । न्या नं ल्हातं हे लायेगु, लायेवं थुखे बँय् ल्वहंतय् बस्वायेगु, न्या सितकि सिन्काय् माः हनेगु । व न्या व कंगलि छेँय् ज्वना वयेगु । सफा यायेगु ।

कंगलि धाःसा ल्वहंमाय् छकः छ्यायेगु अले तिनि धवःचाय् पुकेगु ।न्या व कंगलि पुकाः अप्वःथें बजिनाप नयेगु । पासापिं नाप च्वनाः नयेगु । गबलें गबलें रबरया लिप्पा (कप्तानचा) दयेकाः क्यबय् वनाः चखुंचा स्यायेगु । बखुं नं स्याना । पा पुयाः सफा यानाः चखुंबखुंया तरकारि दयेकाः नयेगु ।

पासापिं नाप जानाः न्या व कंगलि लाः वनेगु व लिप्पा ज्वनाः चखुंबखुं स्याः जुइगु ज्यां यानाः मचाबलय् आखः ब्वने मखन । जि याकः काय, जि तता छम्ह व केहें छम्ह दु, इमित नं स्कुलय् ब्वंकेमछवः । जि १० दँ दुबलय् स्कुलय् भर्ना यानाबिल । बाघभैरव लिक्क २००८ सालय् चायेकूगु छगू पाठशाला दु । बर्मू बाज्या छम्ह आखः ब्वंकीम्ह ।

आखः ब्वंवःपिं सकलें हे छगू हे क्लासय् । ग्वरलय् तुयुगु सलामं आखः च्वयेगु । नमोबागिनिसें अ आ इ ई… त आखः च्वयेगु स्यन । लिपा हाकनं मेगु स्कुल चाल, अन छगू क्लासंनिसें च्यागू क्लासतक ब्वना । येँय्निसें मास्तर वयाः आखः ब्वंकः वइगु । क्लासय् मिसापिं निम्ह स्वम्ह हे जक दु । मिजंत धाःसा यक्व दु ।

जिमि थाना कापःया तपाःलं सुरुवाः न्ह्यायेगु, तपुलिं पुइगु । लाकां न्ह्यायेगु चलन मदु तर लिपा स्कुल वनाबलय् तिनि तिनसूज लाकां न्ह्याना । छेँय् कापः थायेगु तांगा दु, माम्हं कापः थाइ । छेँय् कुति नं वाना । जिं नं अजि, मां, केहेंनाप कुति वाये नं । छवाःतक गाक्क कुति वायेगु । न्हिंन्हिं कुति मवाना ।

कुति वानाः पिकयागु जाकि छेँय् नयेत ल्यंकाः मेगु बोराय् कुबियाः जिं येँया चिकंमुगः गल्लिइ मिउ वनेगु । जाकि फछिया न्याम्वः तू, स्वर्कां मीगु । १२ पाथि तक मिया वयेगु । फछिया छम्वः लबः नयेगु । भिमढुंगा व फय्खाया डाँडाय् मोहनि न्ह्यः सँय्तय्सं मी हइगु जाकि न्यानाः नं येँ वनाः मिउ वना ।

अथे मिउ वनेबलय् न्हापां जा नयाः न्यासि वनेगु, आः थें मोटर मदुनि । बाःनं चित्लाङ, भैंसें दुरु, खौचा कया हइ, जिमिथाय् सालय् काकाः चिकं पिकाइ, चिकं नं मिया । किपुलिइ नयाँबजारं पश्चिम वनेबलय् झ्वःलिक्क प्यंगू पुखू दु, मभिं पुखू, भिं पुखू अले सागलय् च्वंगु लब पुखू व धुंकाःया चिधं पुखू । दू ब्यंकेगु पुखू खः ।

न्हापा अन जोगितय्सं लहिनातःपिं फा ज्वये हइगु, तसकं फोहर । पंचायतकालय् प्रधानपंच जूपिंसं व पुखू मियाबिल । व ध्यबां धल्पाय् स्कुल छगू दयेकल । आः चिधं पुखू मंत, छेँ प्यखा दत । आः नं अन मनूत दू ूब्यंकः वःनि, सिमा छमा धाःसा आतक नं दनि अन ।सागलय् पुखूया लिक्क सो¥हखुट्टे फल्चा छगू दु, व फल्चाय् लः थल दयेकातःगु दु, मातातिर्थ वनावःपिंत व थलय् च्वंगु लः त्वंकीगु चलन दु ।

न्हापा न्हापा व स्वंगू पुखुलिइ ह्याउँपिं, तुयुपिं न्या लहिनाः मीगु व्यवस्था नं दुगु, लिपा ढल निकास दयेकूबलय् पुखूत सुनावन । किपुलिइ लःया दुःख मदु, हिति दु, तुं दु, तर विजुली मत जक मदु । जि ब्याहा याये न्ह्यः जक मत वःगु । १६ सालय् तोखाय् च्वंम्ह रत्नदेवी मानन्धरनाप जिगु ब्याहा जुल । जन्ति वःपिंत ट्रकय् तयाः माम्हं भम्चा काः वन ।

अले भम्चित ग्वंगःबुँइतक दूलिइ तयाहल , अनं हाकनं ट्रकय् तयाः हल । अबलय् भम्चित नितोलाया सिखःमाः व मुन्द्रिचाः बियागु । अबलय् लुँ छतोलाया सछि तका जक तर मांपिं नुगः स्याः । लुँ मन्यासे थःपिनिगु हे पुलांगु तिसा स्यंकाः भम्चित सिखः व मुन्द्रिचाः दयेकाबिल ।
जि ब्याहा याये न्ह्यः १÷२ सालय् बाःनं सल्यानथानया ५ रोपनी जग्गा न्हय्सलं न्यात, छुं ला लिपा झिंप्यसलं मिल ।

वहया डबल ध्यबा बोराय् तयाः ज्यापु छम्हेसित कुबिकाः हल । वा पीगु बुँ नं बाः नं मियाबिल, अले ला बुँइ वा नं पी म्वाःल । मामं सुथय् दुसिया क्वाति दयेकाः त्वंकी, च्या त्वनेगु चलन मदु । जा नाप मायेकेँ व अचार । ला नयेत ला मोहनि वयेकेमानि । किपुलिइ जात्राबलय् खड्ग ज्वनीम्ह जिमि तुइसिं बाज्या, जात्राबलय् किपू देय् चाःहिलीम्ह, जुजु थें जुयाच्वंम्ह ।

तुइसिं द्वारे धाइ बाज्यायात । न्हापा माक्वःचा डाँडाय् फकीर छम्हेसियां कःनि पीगु ज्या यानाच्वंगु, लिपा बांज्यां अन कःनि पीके मबिल ।
किपुलिइ च्वंपिंके न्हापा यक्वसिके तःकै वः । ५÷६ सालपाखे बाःनं जितः सिंहदरवार दुने तक न्यासि यंकाः खोप कायेकूगु । अबलय् मस्तय्त खोप कायेकेत अन हे यंकेमाः । तःकै यक्वसित वल, तःकै वयाः किपुलिइ मनूत यक्व सित । तःकै वयाः मसीपिं यक्व छ्याकः जुल ।

सम्बन्धित बुखँ

LEAVE YOUR COMMENTS