संशोधन यायेत डा. केसी सहमत

येँ – सरकारं पारित यायेत्यंगु चिकित्सा शिक्षा विधेयकय् स्वनिगलं पिने नं चिकित्सा अध्ययन प्रतिष्ठान चायेके दइ कथं संशोधन यायेत डा. गोविन्द केसी सहमत जुयादीगु खँ सीदुगु दु । चिकित्सा शिक्षा विधेयकय् छगू विश्वविद्यालयं न्यागू तक जक चिकित्सा क्याम्पसयात सम्बन्धन बी दइ धइगु बुँदा दुथ्यानाच्वंगु दु ।

थ्व बुँदां यानाः स्वनिगलं पिने चिकित्सा क्याम्पस चायेकेगु लँय् अवरोध वइ धासें उकियात संशोधन यायेत सांसदतय्सं माग याःगु खः । तर डा. केसीं थ्व बुँदा संशोधन यायेत अस्वीकार यानादीगु व थुकिया लागिं खँ ल्हायेत समेत माने मजूगुलिं समस्या जुयाच्वंगु खः ।

उकुन्हु वय्कलं थ्व बुँदा संशोधन यात धाःसा हानं अनसन च्वनेगु जुइ धकाः ख्याच्वः बियादीगु खःसां आः स्वनिगलं पिने चिकित्सक क्याम्पस चायेकेगु शर्तय् थ्व बुँदा संशोधन यायेत सहमति बियादीगु खँ धाःगु दु ।डा. केसीं वार्ता यायेत अस्वीकार यानादीगुलिं नेकपाया सांसद योगेश भट्टराईनं वय्कःयात सामाजिक सञ्जाल मार्फत संशोधन यायेत इनाप यानादीगु खः ।