लुम्बिनीइ न्हापांखुसी अन्तर्राष्ट्रियस्तरया त्रिपिटक वाचन

येँ – बुद्ध जन्मभूमि लुम्बिनीइ न्हापांखुसी अन्तर्राष्ट्रिस्तरया त्रिपिटक वाचनया निंतिं तयारी न्ह्याःगु दु । नेपालय् न्हापांखुसी थुकथंया अन्तर्राष्ट्रियस्तरया त्रिपिटक वाचन अखिल नेपाल भिक्षु महासंघया ग्वसालय् जुइत्यंगु खः । भिक्षु महासंघया ग्वसालय् थ्व हे वइगु कात्तिक २८ गतेनिसें ३० गतेतक लुम्बिनीस्थिति मायादेवी देगः परिसरय् जुइगु त्रिपिटक वाचन ज्याझ्वलय् बुद्ध वचनया संग्रह त्रिपिटकया विनय पिटक, सुत्त पिटक व अभिधम्म पिटक वाचन याइगु जुयाच्वंगु दु ।

अखिल नेपाल भिक्षु महासंघया अध्यक्ष श्रद्धेय भिक्षु मैत्री महास्थविरं त्रिपिटक वाचन ज्याझ्वलं अन्तर्राष्ट्रिय जगतय् बुद्ध जन्मभूमिया प्रचार नापं विश्वन्यंकंया बौद्ध धर्मावलम्बितय्त लुम्बिनी भ्रमण यायेत प्रेरित याइ धयाबिज्याःगु दु । वसपोलं धयाबिज्याःगु दु, ‘भगवान बुद्धया जन्मस्थल जूसां लुम्बिनीइ आतक थज्याःगु ज्याझ्वः छक्वः नं मजुइगु धइगु दुःखया खँ खः । आः थ्व ज्याझ्वलं विश्वया समग्र बौद्धमार्गीतय् ध्यान सालेत सफल जुइ ।’

महासंघया ग्वसालय् राजकीय थाइ बौद्ध मन्दिरया ग्वाहालिइ लुम्बिनी विकास कोष नापं लुम्बिनीइ च्वंगु थीथी देय्या विहारया सहकार्यय् जुइत्यंगु त्रिपिटक वाचन ज्याझ्वलय् विश्वया थीथी झिंच्यागू देय्या न्यासः स्वयां अप्वः बौद्ध भिक्षु, भिक्षुणी, लामा गुरु, आनी, उपासक व उपासिकापिनिगु उपस्थिति दइगु नं वसपोलं कनाबिज्याःगु दु ।

भगवान बुद्धं बोधीज्ञान प्राप्त यानाबिज्याःगु भारतया बोधगयाय् वंगु झिंन्यादँ न्ह्यवंनिसें थुकथंया ज्याझ्वः जुया वयाच्वंगु तर बुद्ध जन्मभूमि नेपालय् धाःसा थुकथंया ज्याझ्वः जुइ मफयाच्वंगुयात वाः चायेकाः महासंघं ज्याझ्वः यायेगु तयारी न्ह्याकूगु खः । ज्याझ्वःया निंतिं स्वीन्यागू लाख तका खर्च जुइगु अनुमान यानातःगु दु ।

ज्याझ्वःकथं न्हापांगु दिं थाइ भिक्षुया नेतृत्वय् त्रिपिटक वाचन यायेगु ज्याझ्वः तयातःगु दुसा निन्हुया न्हिकुन्हु महायानी अर्थात नेपाःया हिमाली भेगया लामा भिक्षुपिनिगु नेतृत्वय् व दकलय् लिपांगु न्हि हाकनं थाइ भिक्षुया नेतृत्वय् त्रिपिटक वाचन जुइ । स्वन्हुया दिं लिपा सहभागि सकसिगुंपाखें मायादेवी मन्दिरउय् शान्ति पदयात्रा लिपा दीप प्रज्वलन यायेगु ज्याझ्वः तयातःगु दु ।

सम्बन्धित बुखँ

LEAVE YOUR COMMENTS