३० युनिट तक मत सितिकं बीगु

येँ(नेपालभाषा टाइम्स)- राष्ट्रपति रामचन्द्र पौडेलं म्हिगः संसदया निगुलिं सदनय् सरकारया नीति तथा कार्यक्रम न्ह्यब्वया– दिल । वय्कः अस्वस्थ जूसां नीति तथा कार्यक्रम वय्कलं पेश यानादीगु खः ।

सरकारया नीति तथा कार्यक्रमय् छुं न्हूगु खँत दुथ्याना–च्वंगु खँ विज्ञतय्सं धाःगु दु । नेपालय् विद्युत उत्पादन अप्वयाच्वंगु सन्दर्भय् सरकारं वा वइगु इलय् लय् ५० युनिट व चिकुलां ३० युनिट विद्युत सितिकं बीगु घोषणा याःगु दु । देय्या रुग्ण उद्योगतय् बारे अध्ययन यानाः उमित सञ्चालनय् हयेगु व मेगु स्वंगू न्हूगु उद्योग सञ्चालन यायेगु नीति नं पित बिउगु दु । लिसें विवादय् लानाच्वंगु निजगढ अन्तर्राष्ट्रिय विमानस्थल निर्माण ज्या न्ह्याकेगु घोषणा नं सरकारं याःगु दु । लुमंकेबहः जू, छुं ई न्ह्यः तिनि निर्माण क्वचाःगु पोखरा व भैरहवाया निगू अन्तर्राष्ट्रिय विमानस्थल निर्माण क्वचाःसां बांलाक सञ्चालन जुइ फयाच्वंगु मदुनि ।

लिसें सरकारं आः वयाः अनावश्यक जुइधुंकूगु सरकारया थीथी विभाग व समितित खारेज याना छ्वयेगु नीति नं दयेकूगु दु ।

स्वनिगः लगायत थीथी लागाया खुसि सिथय् च्वनाच्वंपिं सुकुम्बासीतय्त व्यवस्थापन यानाः अनं चीका छ्वयेगु नीति नं सरकारं ज्वंगु दु । मूल्यवृद्धि पनेगु लागिं ठोस नीति हयेगु लिसें उच्चपदस्थ कर्मचारीतय्गु सम्पत्ति छानबिन यानाः दोषी खने दुसा कारवाही यायेगु तयारी नं सरकारं याःगु दु ।