यलय् मास्क मदुपिंत प्रवेश निषेध !

यल- छु छि यलय् झायेत्यनागु दु ला ? यदि छि यल लाय्कू लागापाखे झायेत्यनागु दुसा अनिवार्य रुपं लुमंक मास्क तयाः जक झासँ । यल लाय्कू लागाय् आवंनिसें मास्क मतसे वइपिंत प्रवेश निषेध याःगु दु । यल लाय्कुलिइ मास्क मतसे वइपिंत दुत मछ्वयेगु ल्याखं प्रवेश निषेध अभियान हे न्ह्याकूगु दु ।

यल महानगरपालिका वडा नं. १६या ऐतिहासिक, सांस्कृतिकलिसें विश्व सम्पदाया धलखय् तकं दुथ्यानाच्वंगु थनया लाय्कू लागाय् मास्क मतसे वइपिंत प्रवेश निषेध यायेगु ल्याखं थ्व अभियान न्ह्याकूगु खः ।

थनया लाय्कू परिसरय् म्वःम्वः मनूत मुनीगु व मास्क मतसे थवंथवय् खँल्हाबल्हा तकं यानाच्वनीगु जूगुलिं ‘बिना मास्क प्रवेश निषेध’ अभियान न्ह्याकूगु खः । थ्व अभियान वंगु मंगलवाःनिसें न्ह्याकूगु खः ।

यल महानगरपालिकाया नगर प्रहरी प्रमुख सीताराम हाछेथुं लाय्कू लागा परिसरय् म्वःम्वः मनूत मुनीगु व मास्क नं मतसे जुइगुलिं यानाः मास्क अभियान अन्तर्गत न्हापांगु चरणय् थुकथंया अभियान न्ह्याकागु खः धयादिल ।

वय्कःयाकथं यल लाय्कू परिसर दुहां वनेगु स्वंगुलिं थासय् विना मास्क दुहां वइपिंत सचेत यायेकथं ‘मास्क विना प्रवेश निषेध’या जनचेतनामूलक बोर्ड तयेगु ज्या जूगु दुसा अज्याःपिं मास्क व स्यानिटाइजर इनेगु ज्या नं यानाच्वंगु दु ।