पशुपतिइ न्हूगु वातावरणमैत्री शवदाह गृह

येँ (नेपालभाषा टाइम्स) – संस्कृत, पर्यटन तथा नागरिक उड्डयनमन्त्री योगेशकुमार भट्टराईनं पशुपतिइ प्रस्तावित गुरुयोजनायात अन्तिम रुप बीगु निंतिं मन्त्रालयं प्राविधिक समिति गठन यानागु खँ धयादीगु दु । वय्कलं थ्व प्राविधिक समितिं स्थानीयवासी लिसें सरोकारवाला निकायलिसे सहलह यानाः स्वला दुने मन्त्रालयय् प्रतिबेदन बीगु खँ धयादीगु दु । एभरेस्ट बैंकं पशुपतिइ दयेकूगु न्हूगु वातावरण मैत्री शबदाह गृह हस्तान्तरण ज्याझ्वलय् न्ववासें वय्कलं धयादीगु थ्व खँ धयादीगु खः ।

पशुपति विकास कोषं स्थानीय नेवाःत विस्थापित जुइगु व थनया धार्मिक सांस्कृतिक सम्पदा, संस्कृति हे न्हना वनीगु कथं वृहत् गुरुयोजना हयेवं स्थानीयवासीतय्सं विरोध याना वयाच्वंगु खः । थ्व हे झ्वलय् स्थानीयवासीतय्सं पर्यटन मन्त्रीयात हे विरोध प्वंकेधुंकाः मन्त्रालयं थ्व प्राविधिक समिति दयेकूगु खः । मन्त्री भट्टराईनं स्वास्थ्य मापदण्ड नालाः धार्मिक सांस्कृतिक सम्पदात नं चायेका यंकेगु खँ धयादीगु दु ।

कोषया सदस्यसचिव डा. प्रदीप ढकालं पशुपतिइ सिइम्ह उइपिं अप्वया वःगुलिं थीथी संघसंस्थातय् ग्वाहालि वातावरण मैत्री शवदाह गृह दयेकेगु ज्या न्ह्याकायंकेगु खँ धयादीगु खः । एभरेस्ट बैंकं ७५ लाख तकाया लागतय् दये काबिउगु न्हूगु शबदाह गृहय् सछि निसें सत्या किलो सिँ तयाः सीम्ह च्याकेफइगु खँ धाःगु दु । थौंकन्हय् भष्मेश्वर व आर्यघाटय् सीम्ह च्याकीबलय् प्यसः केजी तक सिँ वनेगु यानाच्वंगु दु ।

न्हूगु शवदाह गृह सीम्ह च्याकेत नं घौछि निसें सवा घन्टा तक बीगु व थनं पिहां वइगु कुँ नं पिने थ्यनीबलय् तक शुद्धिकरण जुयाः वनेधुंकीगु खँ बैंकया प्रमुख कार्यकारी अधिकृत जिके नेगी धयादीगु दु । म्हिगः हस्तान्तरण याःगु शवदाह गृहय् आःयात कोभिड १९ पाखें सीपिनि सीम्ह च्याकीगु खँ धाःगु दु ।

सम्बन्धित बुखँ

LEAVE YOUR COMMENTS