रानीपुखूया निंतिं प्यक्वःखुसी बोलपत्र

ऐतिहासिक रानीपुखू पुनःनिर्माणया निंतिं येँ महानगरपालिकां प्यक्वःखुसी बोलपत्र आह्वान यायेगु तयारी याःगु दु । भुखाय् ब्वःगु स्वदँ फुइ धुंकाः तकं रानीपुखू गबले पुनःनिर्माण जुइ धइगु विषय अझं अन्योलय् लानाच्वंगु इलय् येँ मनपां बोलपत्र आह्वानया तयारी याःगु खः ।
भुखाय् ब्वःगु हे दँय् माघ महिनाय् राष्ट्रपति विद्यादेवी भण्डारीं रानीपुखू पुनःनिर्माणया शुभारम्भ यानादीगु खःसां निर्माणया ज्यां आतकं गति काये फयाच्वंगु मदुनि ।

येँ मनपां न्हापांखुसी बोलपत्र आह्वान यानाः पुनःनिर्माण याःगु इलय् आधुनिक निर्माण सामग्री छ्यःगु धासें प्यखेरं विरोध जुइवं निर्माणया ज्या दिउगु खः । अथे हे निक्वःखुसी बोलपत्र आह्वान याःसां नं येँ मनपाया मागअनुरुप बोलपत्र प्राप्त मजूगुलिं ज्या न्ह्याः वनेत मफुत । स्वक्वःखुसी अह्वान याःगु बोलपत्रय् निर्माण कम्पनीं येँ मनपां क्वःछिनातःगु स्वयां अप्वः ध्यबा क्यनेवं रद्द जूगु खः ।

येँ मनपां १२ गू करोड ६६ गू लाख क्वःछिनातःगु खःसां नं निर्माण कम्पनीं येँ मनपां क्वःछिनातःगु स्वयां ११ प्रतिशत अप्वः ध्यबा तुइगु धाःगु येँ मनपाया प्रवक्ता ईश्वरमान डंगोलं जानकारी बियादिल । डंगोलं धयादिल, ‘थ्व हे वाःया दुने रानीपुखू पुनःनिर्माणया निंतिं प्यक्वःखुसी बोलपत्र आह्वान यायेगु तयारी येँ मनपां याःगु दु, आशयपत्र पेश यायेगु ई थ्व स्वयां न्ह्यः थें ताःहाकः जुइमखु ।’

निर्माणया निंतिं इच्छा यानाच्वंगु कम्पनीं क्वःछिनातःगु स्वयां अप्वः ध्यबा क्यनेवं प्यक्वःखुसी बोलपत्र आह्वान यायेगु तयारीइ येँ मनपा लगे जूगु खः ।थ्व हे पुस १० गते राष्ट्रिय पुनःनिर्माण प्राधिकरणं आकिवं स्वन्तिया इलय् तकया दुने रानीपुखू निर्माण सम्पन्न जुइगु धाःसां नं उकथंया वातावरण धाःसा खने दयाच्वंगु मदुनि ।

येँ मनपा व पुरातत्व विभाग दथुइ सकारात्मक समन्वय जुइ मफुगुलिं पुनःनिर्माणं गति काये मफयाच्वंगु खः । भुखाय् ब्वये न्ह्यः रानीपुखूया स्वरुप गज्याःगु खः व हे कथं निर्माणया ज्या याकनं यायेत इलय्व्यलय् सम्पदाप्रेमी व राजनीतिक दलया प्रतिनिधिं येँ मनपाया प्रमुख व उपप्रमुखयात ज्ञापन पौ नं लःल्हाये धुंकूगु दु ।

पुनःनिर्माण सम्बन्धी विवाद समाधान यायेत थष्ुने पुस १३ गते गठन याःगु विज्ञ समूहं येँ मनपायात प्रतिवेदन लःल्हायेगु झ्वलय् प्रताप मल्लकालीन शैलीइ निर्माण यायेत छुं नं समस्या मजुइगु सुझाव बिउगु खः । प्रताप मल्लं थः काय चक्रवर्तिन्द्र मल्ल मदयेधुंकाः थः रानीयात चित्त बुझे यायेत वि.सं. १७२७ य् रानीपुखूया निर्माण याकूगु धइगु ल्वहंपतिइ न्ह्यथनातःगु दु ।

पुखूया दथुइ उगु हे इलय् बालगोपालेश्वर देगः स्थापना याःगु खः । प्रताप मल्लं काय चक्रवर्तिन्द्रया नामय् न्यादँ बिकाः पुखू निर्माण याकूगु खः । बालगोपालेश्वर देगःया स्वरुप ग्रन्थकूट शैलीया दुगु खः । थुकिया प्रमाण थौंकन्हय् देगःया प्यखेरं च्वंगु लुखाय् तयातःगु ल्वहंतं दयेकातःगु लुखाफुसं नं पुष्टि याः । उगु खँ प्राप्त पुलांगु देगःया शैलीया ‘स्केच’ पाखें नं प्रष्ट जू ।

पुखुलिइ १०८ गू तीर्थया जल हयाः तयातःगु इतिहासकारतय्सं धायेगु याइ । प्रताप मल्लं निर्माण याकूगु इलय् पुखूया प्यखेरं प्यंगः देगः स्थापना याकूगु खने दु । उकीमध्ये उत्तर–पश्चिम कुनय् शक्तिसहितया भैरवया देगः, उत्तर–पूर्व कुनय् भैरवया देगः, दक्षिण–पूर्व कुनय् देवीया देगः व दक्षिण–पश्चिम कुनय् झिंखुका ल्हाः दुम्ह गणेद्यः स्थापना यानातःगु खनेदु ।

येँ मनपाया प्रमुख विद्यासुन्दर शाक्यं भुखाय् व मेमेगु कारणं दुनाच्वंगु ऐतिहासिक सम्पदा पुनःनिर्माण यायेगु ज्या न्हापांगु प्राथमिकताय् दुगु खँ धया वयाच्वनादीगु दु । थ्व हे झ्वलय् धरहरा पुनःनिर्माणया निंतिं पुस १२ गते प्रधानमन्त्री केपी शर्मा ओलीं शिलान्यास यानादीगु दु । धरहरा निर्माणया निंतिं निदँया ई काइगु नं उगु इलय् जानकारी बिउगु खः । भुखाचं हे पाःताः जुइक क्षति जूगु मरुसतः निर्माणया निंतिं क्षमा पुजा यानाः धार्मिक रुपय् निर्माणया ज्या शुरु जुइ धुंकूगु दु ।

सम्बन्धित बुखँ

LEAVE YOUR COMMENTS