ख्वप कलेज व शारदा क्याम्पसया गरिब व जेहेन्दार विद्यार्थीयात छात्रवृत्ति

ख्वप – ख्वप कलेज व शारदा क्याम्पसया ८० म्ह गरिब व जेहेन्दार विद्यार्थीयात छात्रवृत्ति लःल्हाःगु दु । निगुलिं कलेजया स्नातक तहया न्हापांगु व निगूगु दँ, बीबीएम न्हापांगु सेमेष्टर व स्नातकोत्तर तह निगूगु सेमेष्टरय् अध्ययन यानाच्वंपिं गरिब व जेहेन्दार विद्यार्थीयात छात्रवृत्ति लःल्हाःगु खः ।

छात्रवृत्ति लःल्हायेगु ज्याझ्वलय् कलेज संचालक समितिया अध्यक्ष नापं ख्वप नगरपालिकाया प्रमुख सुनील प्रजापतिं आर्थिक अवस्था कमजोर जुयाः दथुइ हे आखः ब्वनेगु त्वःते म्वाःलेमा धइगु उद्देश्यं नगरपालिकां विद्यार्थीतय् शैक्षिक प्रमाणपत्र ब¥हः कयाः न्यागू लाख तक सहुलियत ब्याजदरय् त्या काये फइगु व्यवस्था यानागु जानकारी बियादिल ।

‘नगरपालिकां सहुलियत शैक्षिक त्यासा प्रवाह सम्बन्धय् कार्यविधि दयेकाः कार्यान्वयनय् हये धुंकूगु दु’, प्रमुख प्रजापतिं धयादिल ।
अथे हे गरिब व जेहेन्दार विद्यार्थीया तकं उच्च शिक्षाय् पहुँच दयेमा धइगु ल्याखं नगरपालिकां कलेज संचालन यानाच्वंगु धासें नगरपालिकाया अनुमतिइ अनुसन्धान व रिपोर्ट तयार याइपिं विद्यार्थीयात नगरपालिकां आर्थिक ग्वाहालि नं बीगु व्यवस्था यानागु वय्कलं धयादिल ।