मधेसय् चुनाव मितिया विरोध
येँ -आकिवं वैशाख ३० गते स्थानीय तहया निर्वाचन यायेगु धकाः क्वःछिउगु सरकारं क्वःछिउगु मितिया विरुद्ध जनप्रतिनिधितय्सं पेश याःगु रिटयात सर्वोच्च अदालतं दरपीठ याना बिउगु दु । महोत्तरीया भंगहा नगरपालिकाया प्रमुख सञ्जीवकुमार साहं वइगु वैशाख ३० गते निर्वाचन यायेबलय् संविधानं क्वःछिनातःकथं थःपिनिगु कार्यकाल न्यादँ पूमवनीगु धासें सरकारया निर्णय खारेजी यायेमाःगु माग सहित सर्वोच्च अदालतय् रिट तःगु खः । तर सर्वोच्चया रजिष्ट्रार नारायणप्रसाद पन्थीं उगु निवेदन दर्ता याये योग्य मजू धासें दर्ता मयासे दरपीठ याना बिउगु खः ।
मयेर साहं थः ७ असोजय् २०७४ य् निर्वाचत जूगु व थःगु कार्यकाल ६ असोज २०७९ य् फुइगु धासें वैशाख ३० गते निर्वाचन यायेबलय् थःगु न्यादँया कार्यकाल पूमवनीगु दावी यानादीगु खः । सर्वोच्च अदालतय् पेश जूगु निवेदन दर्ताया नितिं योग्य मजूसा प्रशासनिक स्तरं हे आधार व कारण खुले यानाः दर्ता मजुइगु आदेश बी फइगु व्यवस्था दु ।
रजिष्ट्रार पन्थीं जारी याःगु दरपीठ आदेशय् ऐनया प्रावधान यथावत दुगु अवस्थाय् मेयर साहं अनुमानया आधारय् निवेदन दर्ता यायेत स्वःगु खँ न्ह्यथनातःगु दु । आदेशय् धयातःगु दु, ‘नगर प्रमुखया न्यादँया कार्यकाल म्हो यायेफइगु प्रवल सम्भावना दुगु धकाः बिना आधार न्ह्यब्वःगु निवेदन ज्वनाः वःगुलिं सर्वोच्च अदालत नियमावली, २०७४ या नियम १८ या आधारय् दर्ता याये मिले मजुल ।’
सर्वोच्च अदालत प्रशासनं याःगु थुगु आदेश विरुद्ध मेयर साहं सर्वोच्च अदालतय् मेगु निवेदन बी फइ । अज्याःगु निवेदन लिपा इजलासं दरपीठया आदेश सदर यात धाःसा उगु निवेदन दर्ता जुइ फइ मखु, बदर यात धाःसा निवेदन दर्ता यायेमाःगु जुइ ।
मधेसय् असोजपाखे जक चुनाव यायेत इनाप
लोकतान्त्रिक समाजवादी पार्टी (लोसपां) मधेश प्रदेशय् स्थानीय तहया निर्वाचन २०७९ या असोज महिनाय् जक यायेत माग याःगु दु । पार्टी अध्यक्ष जितेन्द्र सोनालं म्हिगः छगू विज्ञप्ति जारी यासें उगु माग यानादीगु खः ।
अध्यक्ष सोनालं जारी याःगु विज्ञप्तिइ वैशाख ३० गते स्थानीय तहया निर्वाचन जुल धाःसा मधेश प्रदेशया जनप्रतिनिधिया अधिकार कुण्ठित जुइगु खँ न्ह्यथनातःगु दु ।
उकथं हे विज्ञप्तिइ संविधानं स्थानीय तहया जनप्रतिनिधिया कार्यकाल न्यादँ धकाः किटान यानातःगुलिं देय्या गुगुं नं निकायं उमिगु अधिकार कटौती याये दइमखु धासें निर्वाचन आयोगयाके नं अज्याःगु अधिकार मदुगु जिकिर यानातःगु दु ।
तर निर्वाचन आयोगं धाःसा निर्वाचन ऐन २०७३ कथं फुक्कं जनप्रतिनिधिया कार्यकाल वइगु जेठ ५ गते फुइगु खँ धायेगु यानाच्वंगु दु । २०७३ सालय् स्थानीय तहया निर्वाचन स्वंगू चरणय् जूगु खःसा लोसपां आः नं स्वंगू चरणय् निर्वाचन यायेमाःगु जिकिर याःगु दु । अथे खःसां सरकारं घोषणा याःगु निर्वाचनयात धाःसा लसकुस याःगु दु ।
LEAVE YOUR COMMENTS