विकासया नामय् विनाशपाखे

येँ – थौंकन्हय् नेपालय् समृद्धिया खँ जुयाच्वंगु दुसां नेपाःमित गथे यानाः गरीब जुल धइगु बारे निं सीकेमाःगु खँ च्वमि लिसें विचारक भाजु आहुति (विश्वभक्त दुलालं) कनादीगु दु । येँ १३ वडा ग्वहाली पुचःया ग्वसालय् शनिवाः थनया तख्तीइ जूगु न्हूदँया भिंतुना कालबिल ज्याझ्वलय् न्ववासें वय्कलं थ्व कनादीगु खः ।

नेपालय् विकासया नामय् विनास जुयाच्वंगु खँ कसें वय्कलं स्वनिगःया मौलिकता व थनया बागमति सभ्यता मथूपिं मनूतय्सं शासन यानाच्वंगु कारणं स्वनिगः थ्व अवस्थाय् थ्यंगु खः धयादिल । वय्कलं धयादिल, ‘मन्त्री, प्रधानमन्त्री, विकासविद्, फुक्क पिनें वइ, उमिगु ज्या थन केवल शासन यायेगु खः, विकास यायेगु मखु ।’

उगु हे ज्याझ्वलय् उपत्यका सतक विस्तार संघर्ष समितिया संयोजक सुमन साय्मिं थौंकन्हय् सतक विस्तार विरुद्ध अदालतं हे बुका हःसां नं सरकार धाःसा अदालतया फैसला हे उल्टे यायेगु अभियानय् लगे जुयाच्वंगु द्वपं बियादिल । फुक्क नेवाःत छप्पँ मजूसा आः झीगु अस्तित्व हे समाप्त जुइगु बिचाः नं वय्कलं तयादिल ।

ज्याझ्वलय् विश्व शारीरिक कासाय् स्वर्ण पदक त्याकादीम्ह कासामि महेश्वर महर्जनयात मूपाहां नेपालभाषाया साहित्यकार भूषणप्रसाद श्रेष्ठं हनापौ लःल्हासें सम्मान यानादीगु खः । ज्याझ्वः ग्वाहालि पुचःया दुजः जुजुकाजी महर्जनया सभापतित्वय् जूगु खः ।

सम्बन्धित बुखँ

LEAVE YOUR COMMENTS