पशुपति विकास कोषया बेवास्ता : गोठाटारया ५३४ रोपनी अतिक्रमणय्

येँ (रासस) – पशुपति विकास कोषया स्वामित्वय् दुगु गोठाटारय् च्वंगु ५३४ रोपनी जग्गा वर्षौ न्ह्यवनिसें व्यक्ति व संस्थातय्सं अतिक्रमण याःसां
कोषं वास्ता तकं यानाच्वंगु मदु। कोषया जग्गा थीथी व्यक्ति, संस्थां अतिक्रमण यानाः छेँ टहरा दयेकाः च्वनाचवंगु दु ।

वि.सं. २०४६ सालय् मन्त्रिपरिषद्या बैठकया निर्णय कथं कोषयात बिउगु उगु जग्गाय् कोषं तारबार तकं मतःगुलिं अतिक्रमण जुया वनाच्वंगु खः । अथेहे उगु जग्गां वर्षौ न्ह्यवनिसें लखौं तका बराबरया फि अवैध तरिकां लिकयाः मीगु यानाच्वंगु दु ।

कोषया उगु जग्गाय् छगू सरकारी स्कूल, स्वीगुलिं मल्याक टहरा व छुं छेँ दयेकाः अतिक्रमण यानातःगु दु। गुथिया नामय् देगः, धर्मशाला दयेकातःगु दु । जग्गा दुने आः नं फुटपाथ पसः, व्यक्तिगत मनोरञ्जनस्थल, गाडी चले यायेगु स्यनेगु थाय् दयेकाः अतिक्रमण यानातःगु दु । अथेहे उगु जग्गां न्हियान्हिथं २५ ट्रकं मल्याक फि अवैध रुपं चोरीनिकासी जुयाच्वंगु दु ।

थःगु सम्पत्तिया संरक्षण यायेगु दायित्व संस्कृत, पर्यटन तथा नागरिक उडड्यन मन्त्रालय मातहतय् दुगु पशुपति विकास कोषया खः, तर कोषया ज्याकुथिं मु स्वंगू किमि तापाक लाःगु कागेश्वरी मनहरा नगरपालिका ६ य् लाःगु उगु जग्गां कोषं गाक्क आम्दानी यायेफुगु खःसां बेवारिस अवस्थाय् त्वःतातःगु दु। थौंकन्हय् उगु जग्गाय् तेजविनायक माध्यमिक विद्यालयं नं धमाधम भवन दयेकेगु ज्या यानाच्वंगु दु ।

थन व्यक्तितय्सं दयेकातःगु छेँ, टहरा, दाहालतय् कूलद्यःया देगः स्वयेबलय् थन स्थानीतय् दादागिरि जुयाच्वंगु पुष्टि जू । तर कोषं धाःसा तुलुतुलु स्वयेगु बाहेक मेगु छुं यानाच्वंगु मदु । स्वनिगःया सुगम थासय् च्वंगु उगु जग्गाय् रमणीय धार्मिक स्थल, सांस्कृतिक पर्यटनया आकर्षक गन्तव्यस्थल दयेकेगु फइगु यक्व हे आधार दुसां उगु थाय् कोष व सरोकारवाला निकायं बेवास्ता याःगुलिं थन व्यक्ति व संस्थातय्सं रजाइँ यानाच्वंगु दु ।

थगुने कोषं अतिक्रमणय् लाःगु जग्गा खाली यायेत पौ छ्वयेगु व स्थलगत वनाः माइकिब याःसां उपिं अटेर यानाः च्वनाच्वंगु खँ धाःगु दु। थौंकन्हय् लकडाउनया इलय् मौकाय् लाकाः थन न्हून्हूगु टहरा दयेकेगु व जग्गा अतिक्रमण यायेगु ज्या नं अप्वया वनाच्वंगु दु ।

कोषया सदस्य सचिव डा. प्रदीप ढकालं अतिक्रमणय् लाःगु कोषया जग्गाया संरक्षण व व्यवस्थापनया निंतिं कोषं ज्या सुरु यायेधुंकूगु खँ धयादीगु दु ।

‘न्हियान्हिथं फि खुया यंकाच्वंगु खबर कोषयाके दु, तर सीमाना यकीन यायेत नापजाँच यानाः तारबार तयेमफुपिं थुकियात नियन्त्रण याये मफयाच्वंगु दु’ ढकालं धयादीगु दु। सीमांकनया निंतिं नापी कार्यालयय् पत्राचार यायेधुंगुसां ज्या मन्ह्यानीगु खँ वय्कलं धयादीगु दु । कोषया कोषाध्यष डा. मिलन थापां कोषया जग्गां दँय् ४०-५० लाख तका बराबरया फि खुया यंकाच्वंगु स्वीकार यासें अतिक्रमणय् लाःगु जग्गाय् प्रभावकारी रुपं व्यवस्थापन यायेमफुगु स्वीकार यानादीगु खः ।

कोषया अध्यक्ष संस्कृति, पर्यटन तथा नागरिक उड्डयनमन्त्री योगेश भट्टराई वंगु पुस २६ गते हे उगु थाय्या स्थलगत निरीक्षण यानाः जग्गा संरक्षण यायेत निर्देशन बिउगु खः । थौंकन्हय् पर्यटन मन्त्रालय अन्तर्गत हे च्वंगु उड्डयन मन्त्रालयं त्रिभुवन विमानस्थल विस्तारया निंतिं ज्या यानाच्वंथाय्ज क थनया चा, फि यंकूसां अर्बौ तका कमे यायेफइगु खँ धाःगु दु। तर कोषं धाःसा जग्गाय् छुं वास्ता यानाच्वंगु मदु ।

थ्व जग्गायात कयाः थौंकन्हय् अख्तियार दुरुपयोग अनुसन्धान आयोगं नं चिउताः तयाहःगु दु। आयोगं कोषय् पौ छ्वयाः कोषया हितयात ध्यानय् तयाः उगु जग्गा छ्यलेत धाःगु दु। कोषं थन पशुपति हिन्दू विश्वविद्यालय, पशुपति स्वास्थ्य केन्द्र, पशुपति वृद्धाश्रम, पशुपति गौशाला दयेकेगु व पशुपति क्षेत्र बि १३ या वासिन्दायात पुनस्थापना यायेगु गुरुयोजना दयेकातःगु दु ।

२३१ रोपनी जग्गा गायब
पशुपति विकास कोषया नामय् दुगु २३१ रोपनी जग्गा हे गायब जुयाच्वंगु लूगु दु। कोषया नामय् देन्यंकं दुगु जग्गा मध्ये २३१ रोपनी जग्गा तनाच्वंगु दु। कोषयाके थौं कन्हय् देय्न्यंकं यानाः १८ हजार ३४२ रोपनी ५ आना जग्गा दु ।