व्यावहारिक रुपं नेवाः संस्कार स्यना वयाच्वंगु स्कुल
हलिं नेवाः इंग्लिस स्कुल
थक्वाः (थानकोट)या टक्सार मार्गय् दु– हलिं नेवाः इंग्लिस स्कुल । बथ्व स्कुलय् ब्वंकीगु विषय मेमेगु स्कुलय् थें हे खः । अथे खयां नं थ्व स्कुल मेमेगु स्कुल स्वयां विशेष, मेमेगु स्कुल स्वयां बिस्कं । थ्व हे दावी यानादी स्कुलया प्रिन्सिपल मय्जु रिजु श्रेष्ठं ।
खय्त ला थ्व स्कुल नामं हे बिस्कं खनेदु । थ्व स्कुलया नामय् हे ‘नेवाः’ खँग्वः घानाच्वंगु दु । ‘नेवाः’ खँग्वः घानाच्वंसा स्कुलय् ब्वंकीगु माध्यम धाःसा इंग्लिस हे खः । अथे धकाः हाकनं नां जक ‘नेवाः’ मखु, थ्व स्कुलया उद्देश्य हे नेवाः भाय्, तजिलजिया संरक्षण यायेगु खः ।
‘मचां निसें हे मस्तयत थःगु भाय्, संस्कार, संस्कृति स्यना वन धाःसा हे जक लिपा थ्यंक ल्यंके फइ । थ्व हे खँयात नुगलय् तयाः जिमिसं हलिं नेवाः स्कुल चायेकागु खः’ प्रिन्सिपल श्रेष्ठं धयादी ।
थ्व उद्देश्य पूवंकेत छु याइ ले स्कुलं ?
‘नेवाः भाय्या छगू विषय ला सकसितं अनिवार्य ब्वंका हे वयाच्वनागु जुल’ वय्कलं धयादी, ‘थ्व स्वयां महत्वपूर्ण खँ जिमिसं व्यावहारिक रुपं हे नेवाः तजिलजि, नखःचखः गुकथं हनेगु धयागु स्यनाच्वनागु दु, अले जात्रापात्राबलय् मस्तय्त सम्भव दतले जात्रा जुइथाय् हे यंकाः क्यनाच्वनागु दु ।’
‘यःमरि पुन्हिबलय् मस्तय्त यःमरि नकेगु जक मखु, यःमरि गुकथं दयेकेगु धयागु क्यनाः उमित नं दयेकेबीगु, मांअबुया ख्वाः स्वयेबलय् मस्तय् अभिभावकपिंत नं स्कुलय् हे सःताः ख्वाः स्वकेगु, बुन्हिबलय् मेमेथाय् स्कुलय् थें केक जक ताकेगु मखु, नेवाः संस्कार कथं स्कुलय् हे ख्येँ सगं बिइगु, इहि याःथाय्–बारा तःथाय् यंकाः क्यनेयंकेगु यानाच्वनागु दु । अले स्कुल जःखः जुइगु जात्राबलय् सम्भव दतले मस्तय्त जात्रा जुयाच्वंथाय् हे यंकाः क्यने यंकेगु यानाच्वनागु दु’ प्रिन्सिपल श्रेष्ठं स्कुलं यानाच्वंगु गतिविधि बारे कनादी ।
थज्याःगु हे गतिविधिं ‘हलिं नेवाः स्कुल’यात मेमेगु स्कुल स्वयां बिस्कं यानातःगु खः । थ्व हे बिस्कं विशेषताया कारणं अभिभावकपिं नं लय्ताः ।
थौंकन्हय् अभिभावकपिं तसकं लिमलाः । थः मस्तय् बुन्हि तकं परम्परा कथं हनेत लिमलानाच्वंपिं नं दु । अज्याःपिं अभिभावकपिं स्कुलय् हे मचायात सगं बियाः बुन्हि न्यायेकाबी बलय् ला लय्ताइगु स्वाभाविक हे जुल । थथे लिमलाःपिं अभिभावकपिं लय्ताइगु मेता छगू कारण नं दु, व खः— स्कुल सुथय् ७ ताः निसें सनिलय् ५ ताः तक चाली । लिमलाःपिं अभिभावकपिंसं सुथय् हे मस्तय्त स्कुलय् तये हइ, अले स्कुलं हे मस्तय्त नकेगु त्वंकेगु यानाबी ।
नेवाः स्कुल धाःसां थन २५ प्रतिशत धयाथें गैर नेवाः मस्त ब्वनाच्वंगु दु । उमि अभिभावकपिं नं थः मस्तय्सं नेवाः संस्कार स्यनाच्वंगु खनाः लय्ताः । उकिसनं नेवाः भाय् नं सयेकाच्वंगुलिं लय्ताः । ‘जिमि मस्तय्सं थप छगू भाय् सयेके खन’ गैरनेवाः अभिभावकपिंसं धायेगु यानाच्वंगु खँ मय्जु श्रेष्ठं कनादिल ।
स्कुलय् मस्तय्त नेवाः राय्म्स नं स्यनेगु याः । थज्याःगु नेवाः राय्म्स मस्तय्सं छेँय् वनाः नं हालाच्वनी । थ्व हे न्यँन्यं गैर नेवाः अभिभावकपिंसं नं भचा भचा नेवाः खँग्वः थुइकेगु, न्ववायेगु यानाच्वंगु खँ नं प्रिन्सिपल श्रेष्ठं कनादिल ।
थ्व स्कुल चायेकूगु स्वदँ फुत । स्वदँ न्ह्यव श्रीपञ्चमिबलय् ब्याक्कं नेवाः ख्यलय् ज्या यायेगु ताः तयाः चायेकातःगु ‘हलिं नेवाः गुथिं’ थःगु छगू कचा कथं थ्व स्कुल चायेकूगु खः ।
‘मचाबलय् निसें मस्तय्त भाय् स्यन धाःसा लिपा थ्यंकं ल्यनाच्वनी’ धयागु वाःचायेकाः गुथिं छगू अभियान कथं थ्व स्कुल चायेकूगु खः । थ्व हे अभियान कथं गुथिं वइगु वैशाख निसें येँया न्हूबजारय् मेगु छगू स्कुल नं चायेके त्यंगु दु । टिस्टुङय् नं छगू स्कुलय् गुथिं लगानी यायेगु बारे खँ जुयाच्वंगु दु ।
‘थज्याःगु स्कुल निसःगू ति चायेकेमाः धयागु जिमिगु अभियान खः । उकिं च्याम्ह झिम्ह मिले जुयाः थज्याःगु स्कुल चायेकादिसँ, जिपिं सहकार्य यायेत तयार दु’ गुथिया केन्द्रीय नायः व हलिं नेवाः स्कुलया सल्लाहकार शान्तप्रकाश श्रेष्ठं धयादी ।
‘थज्याःगु स्कुल चायेकल धाःसा छगू ला मचानिसें हे नेवाः भाय्, तजिलजि स्यना वनेखनीगु जुल, मेगु नेवाःतय्त रोजगार नं दइगु जुल । नेवाः भाय् सःगू कारणं हे स्कुलय् रोजगार दइगु जुल धाःसा मांबौपिंसं नं मस्तय्त नेवाः भाय् ल्हाकेत प्रोत्साहन हे याइ’ भाजु श्रेष्ठं थःगु बिचाः तयादिल ।
‘न्हापा स्कुल चायेकाबलय् गैर नेवाःत थ्व साम्प्रदायिक, नेवाः भाय् जक स्यनीगु स्कुल धकाः फहिलाः वनीगु’ गुथिया नायः श्रेष्ठं थःगु अनुभव कनादिल, ‘तर थौंकन्हय् स्कुलया गतिविधि सिइधुंकाः ओहो थ्व ला विशेष स्कुल खः धाइगु । उमित थन बियाच्वंगु संस्कार शिक्षा हे विशेष तायाच्वंगु दु । उकिं नेवाः स्कुल गन धकाः माला वइपिं अभिभावक नं दु ।’
थ्व ला जुल भाय्, तजिलजि संरक्षणय् स्कुलं यानाच्वंगु ज्या । थुकिया लिसें थौंया प्रतिस्पर्धात्मक ईयात ल्वःकथं मस्तय्त तयार यायेत स्कुलं माःगु कथंया ज्ञान बिया वयाच्वंगु दु । अंग्रेजी माध्यमं हे मस्तय्त ब्वंकेगु यानाच्वंगु दु । म्हितेगु, चाःहिकेगु, डान्स, आर्ट–क्राफ्ट थेंज्याःगु अतिरिक्त क्रियाकलाप नियमित रुपं यानाच्वंगु दु । स्कुलया शिक्षकशिक्षिकापिं अभिभावकपिं लिसे सतिक च्वनाः मस्तय् बौद्धिक, शारीरिक विकासय् ज्या यानाच्वंगु दु । थ्व हे झ्वलय् स्कुलं छुं ई न्ह्यव अभिभावकपिनिगु ‘ट्यालेन्ट शो’ ज्याझ्वः यात । ‘थुकिं मस्तय्त नं थः मांअबुपिनि ट्यालेन्ट म्हसिका बिल, अले अभिभावक व स्कुल दथुया स्वापुयात नं क्वातुकाबिल’ प्रिन्सिपल रिजु श्रेष्ठं थ्व ज्याझ्वःया उद्देश्ययात कयाः धयादिल ।
स्कुलं थौंकन्हय् नैकाप, संतुंगः,पश्चिम भेगया फुक्क थाय् लिसें कलंकी तक गाडीया व्यवस्था यानातःगु दु । स्कुलं भुखाचं पीडित निम्ह मस्तय्त थौंकन्हय् छात्रवृत्ति बियाः निःशुल्क ब्वंका वयाच्वंगु दु । अथेहे मांअबु मदुपिं मस्तय्त आवश्यक जूसां स्कुलं निःशुल्क ब्वंकेगु खँ प्रिन्सिपल श्रेष्ठं कनादी । लिसें सुनां नं थथे मांअबु मदुपिंत छात्रवृत्ति बीगु मंदुसा नं स्वापु तयेफइगु खँ सल्लाहकार शान्तप्रकाश श्रेष्ठं धयादीगु दु ।
LEAVE YOUR COMMENTS