सायाःया विकृति बारे सहलह याइगु

येँ (नेपालभाषा टाइम्स)/दँय्‌दसं सायाः पर्वया लसताय् लाकाः न्ह्याका वयाच्वंगु ‘गाईजात्रा महोत्सव’ समय सान्दर्भिक मजू धइगु उजुरी लायेवं आदिवासी जनजाति आयोगं थुकियात कयाः सरोकारवाला पुचःतलिसे सहलह ब्याकीगु जूगु दु ।
नेवाः न्ह्यलुवा मल्ल के. सुन्दरं दुःखया इलय् न्यायेकीगु सायाः पर्वयात ख्यालिन्हिलिया पर्व दयेकाः न्हिलेगु व न्हीकेगु ‘गाईजात्रा उत्सव’ याना वयाच्वंगु पाय्‌छि मजू धासें उकुन्हु सापारु कुन्हु छपु च्वसु च्वयादीगु खः । ‘कान्तिपुर’ न्हिपती पिदंगु उगु च्वसुया लिधंसाय् नेवाः देय् दबुलिं आदिवासी जनजाति आयोगय् उजुरी दर्ता याःगु खःसा उजुरीया विषयय् सहलह यायेत आयोगं अज्याःगु गाईजात्रा महोत्सव ग्वसाः ग्वइपिं नेपाल प्रज्ञा प्रतिष्ठान व सांस्कृतिक संस्थान (राष्ट्रिय नाचघर) यात सहलहया लागिं सःतूगु खः ।
आः वइगु विहीवाः आयोगया ज्याकुथिइ प्रतिष्ठानया कुलपति, सदस्य सचिव, संस्थानया प्रतिनिधि, नेवाः देय् दबूया प्रतिनिधि लिसें च्वसुया च्वमि नेवाः न्ह्यलुवा मल्ल के. सुन्दरयात समेत सःतातःगु खँ सीदुगु दु । च्वमि मल्लं थःगु च्वसुइ सायाःयात गाईजात्रा उत्सव दयेकेगु ज्यायात संस्कृतिइ वःगु विकृति खः धयादीगु दु ।