स्वंगू अन्तर्राष्ट्रिय संस्थायात स्पष्टीकरण कायेत निर्देशन
येँ (नेपालभाषा टाइम्स) – सर्वोच्च अदालतया न्यायाधीशयात राजीनामा बीत दबाब बिउगु धकाः वक्तव्य बिउगु स्वंगू अन्तर्राष्ट्रिय संस्थायाके स्पष्टीकरण कायेत संसदीय समितिं सरकारयात निर्देशन बिउगु दु । म्हिगः च्वंगु प्रतिनिधिसभा अन्तर्गतया कानुन, न्याय तथा संसदीय समितिं महिला, बालबालिका, लैंगिक तथा यौनिक अल्पसंख्यक व सामाजिक सुरक्षा मन्त्रा–लययात स्पष्टीकरण कायेत निर्देशन बीगु निर्णय याःगु खः । समाज कल्याण परिषदय् स्पष्टीकरण दर्ता जुइगु जुयाः समितिं उगु मन्त्रालययात स्पष्टीकरण कायेत निर्देशन बिउगु खः ।
एमनेष्टी इन्टरनेशनल, इन्टरनेशनल कमिशन अफ जुरिस्ट्स व ह्युमान राइट्स वाचं छुं न्हि न्ह्यव विज्ञप्ति जारी यानाः सर्वोच्च अदालतया स्वम्ह वरिष्ठ न्यायाधीशतय्त राजीनामा बीत दबाब बिउगु व राजीनामा मबिल धाःसा महाअभियोग तयेगु ख्याच्वः बिउगु धासें मंकाः विज्ञप्ति पिकाःगु खः । उगु विषययात कयाः सरकारपाखें कानुन, न्याय तथा संसदीय मामिला मन्त्री सोबिता गौतमं स्पष्टीकरण बीधुंकूगु दु । आः विज्ञप्ति पिकाःगु स्वंगू संस्थायाके नं स्पष्टीकरण कायेत निर्देशन बियागु खँ समितिया सभापति समीक्षा बास्कोटां कनादीगु दु ।
थ्व स्वंगुलिं संस्थां नां हे क्वःछिनाः सर्वोच्च अदालतया वरिष्ठ न्यायाधीशपिं सपना प्रधान मल्ल, हरि फुयाल व कुमार रेग्मीयात राजीनामा बीत दबाब बिउगु व राजीनामा मबिल धाःसा महाअभियोग तयेगु ख्याच्वः बिउगु खँ विज्ञप्तिइ न्ह्यथनातःगु खः । म्हिगः संसदीय समितिया बैठकय् स्वंगू संस्थाया प्रतिनिधितय्त नं सःतातःगु खःसां उपिं उपस्थित धाःसा मजू । निगू संस्थाया प्रतिनिधिपिंसं वयेगु धकाः खबर याःगु खःसां नं उपस्थित मजूगु खँ धाःगु दु ।
म्हिगः जूगु सहलहया झ्वलय् संविधानविद् विपिन अधिकारीं अन्तर्राष्ट्रिय मानवअधिकारवादी संघसंस्थां नेपाःया न्यायपालिकाया स्वतन्त्रताय् न्ह्यसः थंगु खँयात गम्भीरतापूर्वक कायेमाःगु खँ धयादीगु दु । वय्कलंअन्तर्राष्ट्रिय प्रतिवेदनं नेपाःया न्याय–पालिकाय् गम्भीर खतरा खंगु धासें उकियात उपेक्षा यायेमजिउगु तर्क यानादीगु खः । अधिकारीं स्वंगू संस्थां दाबी याःगु खँयात कयाः विश्वसनीय प्रमाण फ्वनेमाःगु धासें यदि न्यायालयया छविइ आँच वइगु ज्या जूगु खःसा उकिया निष्पक्ष छानबिन यायेगु प्रतिबद्धता प्वंकेमाःगु खँ नं धयादीगु दु ।
समितिया सहलहया झ्वलय् नेपाली कांग्रेसया सांसद मनमाया विश्वकर्मां स्वतन्त्र न्यायपालिकाया गरिमाय् न्ह्यसः ब्वलनीगु लोकतन्त्रया निंतिं सुखद संकेत मजूगु खँ धयादीगु दु ।
वय्कलं न्यायालयप्रति जनविश्वास कायम यानातयेत सरोकारवाला निकायगम्भीर जुइमाःगु खँय् बः बियादीगु दु । उकथं हे वय्कलं सरकारं न्यायपालिकाया कार्यक्षेत्रय् हस्तक्षेप याये मजिउगु व लाथेपाथे निर्देशन बी मजिउगु खँ धासें न्यायालयपाखे जुइगु टिप्पणी व फैसला संसदं दयेकूगु कानुनया परिधिदुने लाः मलाः धइगु समीक्षा यायेमाःगु खँ नं धयादीगु दु ।
LEAVE YOUR COMMENTS