न्हूदँ हानं वइतिनि

थुगुसी नेपाल संवत् ११४२या न्हूदँया लसताय् जूगु प्यंगू ज्याझ्वःया ब्वना पतिइ मिखा वन । संयोग, प्यंगुलिं ब्वनापौ प्यंगू प्रमुख राजनीतिक दलया । प्यंगू मध्ये स्वंगू सत्तारुढ दलत नेपाली कांग्रेस, नेकपा माओवादी केन्द्र व नेकपा (एकीकृत समाजवादी)या खःसा मेगु छगू प्रमुख प्रतिपक्ष दल नेकपा (एमाले)या जुल ।

उगु ब्वनापौ प्यंगू राजनीतिक दलतय् थीथी जिल्ला, वडा लगायत स्थानीय कचातय्सं स्वन्ति, छठ नापं नेपाल संवत्या न्हूदँ ११४२ क्यंगु लसताय् यायेत्यंगु ज्याझ्वःया खत । न्हूदँया लसताय् याःगु ज्याझ्वःया ब्वनापतिइ नेपाल संवत्या तिथि धाःसा मदु, केवल विक्रम संवत्या मिति जक । ब्वनापतिइय् नेपाल संवत्या तिथि मतसें विक्रम संवत्या मिति जक दुथ्याकूगु धाःसा संयोग मखेफु । थ्व सायद नेपाःया राजनीतिक दलतय्सं नेपाल संवत्यात गुकथं स्वइ धयागुया संकेत जुइफु । उकिं स्वन्ति, छठ व नेपाल संवत्या न्हूदँया लसताय् ज्याझ्वः धकाः ग्वसाःग्वय्गु तर वहे संवत्या तिथि धाःसा गनं उल्लेख मयायेगु ।

दँय्दसं न्हूदँया लसताय् थीथी ज्याझ्वःत जुइ । राजनीतिक दलया नेतातय् उपस्थिति नं दइ । संवत्या महिमागान निसें राष्ट्रियताया बारे ततःधंगु न्वचु बी । शंखधरया बारे ज्ञान बीगु निसें कयाः वय्कलं याःगु लोककल्याणया ज्याया बारे प्रवचन जुइ । प्रधानमन्त्री तःगू मछि ज्याझ्वःया मूपाहाँ जुयाः ब्वति कयाः थःगु लेटरप्याडय् नेपाल संवत्या तिथि उल्लेख यायेगु बचं बियादी ।

राष्ट्रपतिं नेपाल संवत्या भिंतुना धासें भिंतुना सन्देश छ्वयादी । तर न राष्ट्रपतिया भिंतुना सन्देशय् नेपाल संवत्या तिथि दुथ्याः न प्रधानमन्त्रीं थःम्हं कबुल यानादी कथं थःगु लेटरप्याडय् नेपाल संवत्या तिथि दुथ्याकादी । सार्वजनिक खपट व मतदातातय् नुगः सालेगु निंतिं न्हूदँया ज्याझ्वः निसें न्ववायेगु इलय् नेपाल संवत् व शंखधर साख्वाःया बयान यायेगु तर व्यवहारय् छ्यलेत धाःसा न्ह्याब्लें लिउने । उकिं राजनीतक दलतय् ब्वनापतिइ नेपाल संवत् न्ह्यमथनेगु धयागु केवल संयोगया खँ जक मखु, नेपाल संवत्यात उगु पार्टी गुकथं स्वइ धयागुया संकेत नं खः ।

थ्वला राजनीतिक दलतय्सं दछिइ छक्वः पार्टीं नेपाल संवत्यात मान्यता बियातःगु दु धकाः क्यनेगु निंतिं याइगु खँ जक जुल । थन खँ राजनीतिक दलतय् जक धाःसा पक्कां मखु । नेपाल संवत्या न्हूदँ उत्सव नं खः तर थ्व छगू आन्दोलन नं खः । निश्चित उद्देश्य प्राप्त यायेगु निंतिं शुरु जूगु आन्दोलन । उकिं उत्सवया कथं हनेगु झ्वलय् झीसं ल्वःमंके मजिउगु खँ धयागु आन्दोलनया मुद्दा खः ।

नेपाल संवत्या आन्दोलन सुरु जुइधुंकाः राष्ट्रिय संवत्या मान्यता निसें संवत्या पलिस्था याःम्ह शंखधर साख्वाःयात राष्ट्रिय विभुति घोषणा यायेगु तकया उपलब्धी चूलायेधुंकूगु दु । अथेखःसां संवत्यात व्यवहारय् छ्यलेगु निसें कयाः शंखधर साख्वाया बारे दुथ्यंक अनुसन्धान यायेगु तकया आपलं मुद्दा अझ नं दनी । नोटय् नेपाल संवत् छ्यलेगु, ब्वनेकुथीइ थुगु संवत्या महत्वयात कयाः पाठ्यक्रम दयेकेगु आदि आदि ज्या नं ल्यं दनि ।

राजनीतिक दलतय्सं थौं नेपाल संवत्यात छगू उत्सवया कथं जक हनाच्वंगु दु । तुच्चा व भिंतुना कालबिल थुकीया दसूत खः । थ्व छगू आन्दोलन नं खः, थुकीया मुद्दा पूवंकेगु निंतिं झी थः नं न्ह्यचिलेमाः धकाः गबलें न्ह्यःने वंगु मदु । झीसं नं न्हूदँ दछिइ छक्व तसकं तःजिक हनाच्वना, छगू उत्सवया कथं । उत्सव हनाच्वंगु इलय् गनं झीसं आन्दोलनया मुद्दात ध्याकुने लाकेगु ज्या जकं यानाच्वंगु मदुला ?

दच्छियंक जुइमाःगु आन्दोलनया निरन्तरता धाःसा उत्सव हनेगु नामय् यासुयाच्वंगु जकं खःला ? न्हूदँयात उत्सवया कथं तःजिक हनेमाः, हनाच्वंगु दु । थ्व छगू सकारात्मक कुतः खत । अथेखःसां थ्व छगू आन्दोलन नं जूगुलिं थुकीयात आन्दोलनया निरन्तरता नं दयाच्वनेमाः । आन्दोलनया स्वरुप पानावनेफु । ई कथं, माः कथं आन्दोलन यायेगु, आन्दोनलया मुद्दा ल्ह्वनेगु तरिका पायेफु । उत्सव हनेवं आन्दोलनया मुद्दा तनावनी धइगु जुइमखु, नापनाप नं वनेफु । थुकीया निंतिं आन्दोलित जुयाच्वंपिनि उद्देश्य धाःसा प्रष्ट जुइमाः ।

आन्दोलन छन्हु जक यानाः उपलब्ध जुइगु खँ मखु । नेपाल संवत्या आन्दोलनयात जक दुवालेगु खःसा नं झीसं थौं तकया अवस्थाय् थुलि उपलब्धी चूलाकेत दँ दँ बीत । न्हापाया लकस स्वयां आःया लकस नं यक्व पायेधुंकूगु दु । आःया इलय् नेपाल संवत्यात न्हापा थें राज्यं क्वत्यलेगु कुतः यानाच्वंगु मदु । न्हापा छन्हु जक ज्याझ्वः यायेत नं राज्यपाखें सुलाः सुलाः यायेमाःगु अवस्था दुगु खः । थौं दछियंक ज्याझ्वः यायेत नं झीत छुट दु ।

आन्दोलन छम्ह व्यक्ति, छगू पुचः व छगू संस्थाया जक दायित्व मखु । नेपाल संवत्या आन्दोलन व थुकीया माग पूवंकेगु धयागु नं थुकी संलग्न जुयाच्वंपिं प्रत्येक मनूतय् जिम्मेवारी खः । उकिं नेपाल संवत् हनाच्वंपिं राजनीतिक पार्टी निसें सामाजिक संस्थातय्सं दछियंक जुइगु थःगु ज्याझ्वलय् नेपाल संवत्या तिथि मिति छ्यलेफुसा थ्व नं छगू उपलब्धी जुइफु ।

प्रत्येक व्यक्तिं थः संलग्न खलः, पुचः, संस्था, राजनीतिक दलयात दछिइ छक्वः मखु दछियंक नेपाल संवत्या मुद्दायात कयाः ज्याझ्वः यायेगु, दबाब बीगु यायेफुसा थुकिं नं सकारात्मक लँपुपाखे न्ह्यःने यंकेत ग्वाहालि जुइ । फुपिंसं स्थानीय, प्रदेश व केन्द्र सरकारयात दछियंक दबाब बियाच्वनेफुसा उकिं नं उपलब्धी चूलाकेफइ । नेपाल संबत्या बारे ल्ह्वनाच्वंगु गुलि नं मुद्दा दु उकियात दछियंक निरन्तर रुपं ल्ह्वनेगु खःसा गनं मेगु न्हूदँ न्ह्यः हे झीगु माग पूवनीगु जकं खःला ? राज्यपाखें सम्बोधन जुइगु जकं खःला ? मखुसा दँय्दसं हानं न्हूदँ वइतिनि, उगु इलय् थ्वहे मुद्दा पूवंकेगु निंतिं छन्हुया निंतिं जूसां हानं तःजिक नारा थ्वयातुं च्वनी ।

 

सम्बन्धित बुखँ

LEAVE YOUR COMMENTS