येँया फोहोर मेथाय् वायेत विकल्प मालाच्वन

येँ / उपप्रधान लिसें सहरी विकासमन्त्री प्रकाशमान सिंहं स्वनिगःया फोहोरयात दिर्घकालीन व्यवस्थापन यायेगु निंतिं सिसडोल व बञ्चरेडाँडा ल्याण्डफिल साइटया विकल्पया अध्ययन यायेत, सिसडोल लागाय् खनेदुगु समस्या समाधान यायेत व स्थानीय मागयात सम्बोधन यायेत मन्त्रालय निरन्तर रुपं सक्रिय जुयाच्वनागु खँ धयादीगु दु ।
राष्ट्रियसभाय् मंगलवाः लिसः बीगु झ्वलय् वय्‌कलं उगु खँ धयादीगु खः । वय्‌कलं बञ्चरेडाँडाय् फोहोर व्यवस्थापनया ज्या वैज्ञानिक ढंगं न्ह्याकेगु निंतिं येँ महानगरपालिकालिसे सहकार्य जुयाच्वंगु खँ नं धयादीगु दु ।
लिसें फोहोर वायेगु ज्यायात व्यवस्थित यायेगु, फोहोरं उत्पादन जुइगु व्याक्टेरिया म्हो यायेगु, फोहोर वर्गीकरण यानाः मत व कम्पोष्ट साः उत्पादन यायेगु, कच्चा पदार्थ प्रशोधन यायेगु ज्याय् येँ मनपालिसे सहकार्य याना वयाच्वनागु खँ नं वय्‌कलं धयादीगु दु ।
उकथं हे वय्‌कलं बञ्चरेडाँडाय् ४० मिटर मध्ये २५ मिटर बार दयेकेगु ज्या क्वचाःगु जानकारी नं बियादीगु दु ।